【士㞗彈系列】《她被寄宿到鹽水男孩的家中》2K15中: K994

頭嗰十幾秒純音樂完咗之後，幽蘭跳咗出嚟接返主音結他，鼓聲同bass聲迅即響起；喺一段激昂嘅混奏之後，突然又靜返落嚟由QQ嘅鋼琴聲伴奏幽蘭唱出第一句，接落嚟就係易汪嘅間入…
喺呢個時候我驚覺到原來後面塊幕播緊幽蘭嘅大頭樣！足足有半個禮堂咁高，直播畫面overlay咗落去佢哋嘅背景上面…而下一秒畫面又變成QQ，佢交叉手用右手彈緊左邊嘅三角琴，而左手就彈緊右手邊向住觀眾嘅keyboard bass！幽蘭講嘅反轉彈，結果QQ就用交叉彈嚟解決！而QQ嘅姿勢係曲膝擘腿座低個人，上半身就跟隨音樂節奏喺度戳下戳下，加埋套制服同魔鬼身材…
唔得，呢個畫面唔關我事，我唔係觀眾嚟，而佢哋每個人都專心致志喺自己嘅演出上面，我要打開對耳仔望實眼前部console，尤其要平衡返啲鼓聲。
一切都好順利，我聽到嘅音樂同歌聲似乎比起我聽開嘅更加悅耳動聽，收結嗰句班長亦都唱得合格有餘。
當然中間最難唱嘅部份係由QQ嘅響亮清脆加上YY嘅柔韌沉實包辦，Zilvia就唱襯音嘅多。
終於完咗嘅我唔知應該要有乜感覺好，個心第一次有呢種分離嘅觸動…由於佢哋係最後一個小組，所以布幕正喺度徐徐拉埋，等佢哋可以執返個台俾人跳舞。
Q：「咪發夢啦！要掹線執樂器喇！」
Y：「重要推返埋座琴呀！係你啲手尾嚟！」
呢兩個女仔，就係開工，所有嘢都係為個活動而設想，自己嘅比賽反而係其次…當然，我今次有mute咗master先掹線，然後就跑去另一邊推返部琴埋去。
QQ就一手攞keyboard另一手攞腳架同電腦，話咗佢得…




「等我哋嚟啦。」係音樂組啲人，當我正想搬set鼓…
「Encore…Encore…」出面嘅世界喺度起哄。
Y：「無呀，收工喇！免費表演重咁多要求。」呀娘娘，我唔介意開返聲攞枝咪擺喺妳面前等妳重覆一次㗎。
終於喺大量人力之下，兩分鐘唔使就清走晒啲樂器同線，重有五套佢哋頭先變完身劈咗喺地下嘅修女服。
Q：「欸…佢兩個喺度做乜呀？」原來幽蘭攬住咗Zilvia。
U：「唔知…啱啱完咗之後佢就攬住Zilvia喺度喊。」
大小姐又攪乜…不過呢個畫面幾得意，又高又瘦嘅Zilvia一面茫然咁喺度呵佢個頭。
Q：「傻瓜，無人聽到妳彈錯喎，唔好喊啦。」
V：「邊有彈錯！唔好屈我，我開心得滯咋嘛。」
Q：「好喇好喇，咁嚟個三文治啦。」QQ用個心口頂落幽蘭個背脊度，然後又扣住Zilvia條腰，你話實在係幾咁幸福，都唔知有幾多男仔想做中間嗰件餡。