【士㞗彈系列】《她被寄宿到鹽水男孩的家中》2K15中: 2K122

我：「唔識咪學囉，始終妳讀咗咁多年女校…但係妳同我相處都無問題吖。」
V：「其實我係唔識同你相處㗎，只係茜旎向我拍心口保證，對住你做乜都得，如果有投訴嘅就同佢講，佢會處理咗你，事實證明無錯，我㧻你又得，搣你又得。」
我：「妳講還講，唔使做出嚟嘅…」
V：「我鍾意呀，而家係咪嫌我任性喇？」
我：「點會喎，女仔有啲任性…咁先可愛㗎嘛。」佢講得啱嘅，如果佢識得同男仔相處，就唔會攬住識咗無幾耐嘅我喺度喊，重叫我摸佢身體，只係我相容性太高先唔覺得呢樣係一個問題。
我：「據我嘅認知，你隔籬嗰兩個男同學都係正常人嚟，有個重係肥豬嘅死黨，所以妳唔使驚，對人好啲都得。」
V：「唔好啦，茜旎講過男仔有好多無謂嘅幻想，就算對住佢哋笑得甜少少都會覺得妳對佢有意思，以為自己有機會，我唔想人哋誤會。」QQ就係不停利用粉絲嘅誤會…
我：「如果係咁，妳又唔驚我誤會？」
V：「有乜可能，你咁沉迷茜旎，我除晒衫你都無反應啦。」妳成日都除晒衫啦，係未除裙咋嘛。
我：「唔係嘅，我覺得妳好靚女㗎，高貴得嚟又有氣質。」




V：「不過你成個心都係茜旎，最鍾意就係同佢玩，啱唔啱先？係佢先咁清楚你嘅心意又識得配合你。」
我：「妳咁講…又唔可以話係錯嘅。」
V：「你重要同佢住埋一齊喎，有乜可能唔俾佢綁死呀，淨係一對靚波波都夠收拾到你聽聽話話。」
我：「我覺得，佢嘅內在比佢嘅外表更加過份…係呢，妳聖誕節真係可以陪佢去影相㗎？」
V：「點解唔得呀！我剩係想玩一日咁多咋！已經平安夜，聖誕日，同埋除夕都無得出嚟玩。」
我：「明明放緊假…點解重忙過返學咁嘅？」
V：「平安夜家族聚餐，聖誕有商界酒會，都係咁啦。」
我：「都正常嘅…同埋星期日做乜叫我哋嚟嘅？其實妳是但攞兩份啱使嘅禮物畀我哋咪得囉。」
V：「咁我想見下你哋係咪唔得先？音樂日完咗之後又無理由叫佢哋上晒嚟我屋企，同埋送禮物畀人係應該自己揀㗎嘛，點可以搵我代勞。」
我：「妳屋企有好多物資咩？」




V：「都多㗎，文具同電子用品一大堆，重有啲精品。」
我：「你哋本身無用嘅咩？」
V：「有乜用？你有十隻手指揸唔揸到十枝筆？」
我：「如果無用其實係咪應該攞去賣？」