【士㞗彈系列】《她被寄宿到鹽水男孩的家中》2K15中: 2K149

我：「我認真㗎，好多男仔諗住平安夜開齋，就算佢係正人君子都係咁話，唔好話我唔提妳，最好有心理準備。」
K：「關於呢個…我唔會唔肯畀佢嘅，其實我都想…不過就無諗住咁快，雖然我哋無講出口，但應該有共識掛，如果佢好想要又點會無夾硬嚟嘅機會吖…但係…我都唔知幾時做呢樣嘢會比較合適，只係覺得將平安夜變做失身夜呢件事係非常戇㞗，而且怕影響關係。」
我：「同意嘅，啲人話大時大節係特別容易鬧架㗎，每日平常心先容易行得耐，但係擺得過平安夜唔知又擺唔擺得過扑星day呢？」我都想知，QQ同條仔鬧架又關唔關聖誕事，對情侶嚟講，聖誕同情人節都係年關嚟。
K：「收聲啦，我失唔失身都唔關你事呀，雖然…我已經偷偷咁放咗一個安全措施喺銀包，但就唔諗住用嘅。」
我：「妳識未雨綢繆就最好啦，千祈唔好俾佢知。」
其實我都幾同意佢嘅觀點，兩個人喺埋一齊開開心心好自然就會發生嗰件事，如果特別約一個時間嚟做就好似有失原意，所以我都無特別問QQ係咪十六歲生日嗰晚就會畀我，最重要係我哋而家每日都過得好舒服。
望下遠處嘅QQ，個曳妹攤咗喺枱面瞓緊；男班長就側起個身右手手踭墊住枱面托住個頭望住佢背脊，然後見我望過去又會望返過嚟，中間會經過幽蘭，有時佢都會發現我哋嘅視線喺度碰撞。
我：「喂，如果男班長講起，妳同佢講係我多口就得，其實邊個坐我隔籬都會係咁謦欬，我對妳無特別嘅。」
K：「係咩？如果佢呷醋嘅話我會開心㗎喎。」
我：「咪玩啦，我唔想無端端得罪人呀。」




K：「你身邊已經大把女，如果重想黐埋嚟就真係自殺。」例如前面嗰位…又或者QQ會處決我？
今日星期五，按慣例班女神又有一大堆課後話動，音樂組嗰幾個當然要去分享下兼慶功。
Y：「喂，死仔包，唔好返去大覺瞓，記住陣間攞返兩袋嘢落嚟呀。」
我：「妳急嘅話我咪即刻攞落嚟，十分鐘唔使。」
Y：「咁又唔好，會阻住我哋，就五點鐘啦。」
Q：「唔使喇，我呢邊散咗都未走得，要同幽蘭佢搵一搵社長，謦下嚟緊陸運會嘅安排，所以我負責搵佢攞。」
我：「咁妳到時打畀我啦，會即刻攞落嚟。」
麻鬼煩，明明QQ自己上嚟攞就得…
健：「你個女神同瘟神幽會，竟然一啲反應都無。」
我：「你所講嘅幽會，意思係咪同幽蘭一齊會見社長…重好意思講我嘅，你個情人…就嚟要夫目前犯喇。」