真·後現代末世純手寫校愛網小《交叉仔傳記》: 2K182

我：『辛苦晒…但第六日夜晚返嚟，咪要朝早攪埋？抖得幾個鐘你掂唔掂㗎…』
A：『真係精打細算，一嘢就講中咗我嘅痛點，唔知走唔走得甩呢…如果夜機上面交到功課就好。』
我：『你以為搭緊A380總統房？不如叫埋啲空姐幫手打氣好唔好？講返正經嘢，band房今日有無人用呀？』
A：『小姐，有乜可能無呀，星期六最爆㗎。』
我：『我都知，有無time slot係無人㗎？』
A：『妳想點先？要練嘢？定係錄音？』
我：『我漏咗啲嘢喺上面想攞返啫。』
A：『漏咗乜？唔通大千金管家還嘢嗰陣攞埋妳啲嘢？』
我：『係呀，有個結他pick係我嘅…』
A：『妳好地地彈琴學乜嘢人玩結他pick啫。』




我：『你理得我吖，總之我想上去攞返得唔得先？』
A：『妳咪直接敲門入去囉，我諗唔會有人阻住妳搵嘢…』
我：『唔好啦，夾得band嘅都係仔嚟…』
A：『咁咪啱，妳唔係鍾意仔仔嘅咩，幫手彈下琴囉。』
我：『認真啲好唔好，我只係想上去搵返個pick。』
A：『坦白講，執嘢嗰個見到pick都係掉落個箱度，妳搵唔搵得返都成問題，入面有好幾百個…』
我：『所以我咪想等無人先上去慢慢搵囉。』
A：『可惜我唔喺香港，如果唔係我實上去陪妳搵。』
我：『呀皇上哥哥，你有無對我咁大興趣呀？』
A：『我敢講，妳係我見過而又最想體驗嘅女仔嘅三甲之內，如果我重係一個中學生嘅話早就狗衝咗…妳等一等，我要上網望下個時間表。』




三甲…我係咪應該要開心…另外兩個應該唔會有我啲姐妹份掛；但調返轉嚟講，佢對我而言又何嘗唔係一個好吸引嘅哥哥嚟，識得玩又識得認真，唔似得啲得把口剩係識得諗自己嘅男仔，而且又多才多藝，真正音樂人，而我身邊呢個連即時轉scale都做唔到…
如果搵笪有情調嘅地方，一邊玩音樂，一邊做愛…
如果有得體驗A380總統房，都唔介意同兩位姐姐一齊…玩啫，唔覺得我有機會可以贏到佢嘅真心…
A：『無噃，至到十點都有生意，妳敲門算啦，一係等平日啦，我諗唔會有人對妳個pick有興趣，上面個箱越放越多，我就嚟想搵人幫我賣緊啲。』
我：『所以我咪要盡快上去囉，如果有臭男人用咗我個pick點算喎，十點後上去得唔得呀？』
A：『妳講到咁…妳鍾意嘅話半夜自己走上去都得㗎。』
我：『真係可以？點入去呀？』
A：『咪玩啦，都係嗰個密碼咋嘛，唔係唔記得呀。』
我：『其實我都想問，嗰度長期無管理員，有密碼就入到，你唔驚租房啲人上去偷嘢或者搗亂㗎咩？』