我是一個學界的灰姑娘: 24. 媽媽會唔會再婚呢?

夜晚係宿舍，我地同偉叔係到食飯，真係好似小敏姐姐咁講，我地真係幾似一家三口嘅
 
有一日，偉叔就問我地去唔去飲茶
 
「唔?飲茶?」我呆下呆下咁問
 
「上次家琪妳話過好多年冇去過茶樓嘛，我同妳地去啦」
 
「偉叔呀，我都未試過係Landmark中庭間café high tea添喎」
 




「果間可以去呀，其實唔太貴咋」
 
媽咪聽到我咁講，要話一話我
 
「阿女妳咁細個學咩人去High tea?」
 
「講下者媽咪，d同學去過話係一般咋」
 
於是偉叔就同我地去左西營盤飲茶
 




係爸爸走左之後，我去飲茶次數真係一隻手都數得哂
 
所以我一聽到可以出去食飯飲茶，每次都好開心
 
「係喎，美姐，妳地點識Miss Lam一家架?」
 
「就係舊年，我帶家琪搭電車，點知自己又病左，去到堅尼地城個公園坐低。呢個傻女走去便利店偷藥俾我，佢又俾警察見到，佢逃走果時盲中中咁去左林醫生到，之後就遇上Miss Lam個女啦」
 
「估唔到家琪妳咁為美姐著想喎」
 




「咁媽咪係我唯一親人，我點都要救佢架啦」
 
「我都知林醫生出名好人架啦，有時我唔舒服都會落去睇佢。我地學校有好多老師有唔舒服都立即去睇佢」
 
到我地飲完茶要俾錢果時，偉叔幫我地出錢
 
之後我地三個四周圍行下
 
我真係好多年冇咁樣假日行街啦
 
偉叔又真係好照顧我地兩母女，佢又自己孤身一人…唔…
 
佢又幾似我爸爸嘅，有時會問下讀書辛唔辛苦之類
 
不過媽媽嘅事就交返俾佢自己決定啦，但係我都有D八掛嘅




 
「媽媽，有野要問問妳」當媽媽洗完衫後，我決定問下佢
 
「咩事呀?」
 
「妳有冇打算幫我搵個後父返黎呀?」
 
「下?!」媽媽一時唔知點答
 
「我係話，妳應該要搵返個伴過下半世」
 
「做咩妳咁講呀」
 
「前排同小敏姐姐傾開佢有男仔追嘅事，講講下就講到妳」
 




「我大人嘅事，唔需要妳地兩個細路女管」媽媽好有自信咁講
 
「唔知妳啦，妳自己諗啦」
 
搞掂，話題完畢，繼續溫書
 
係我入左排球隊後，每日時間分配上實用左
 
始終我都唔可以一日到黑掛住溫書呢…
 
我同一班同學嘻嘻哈哈咁樣，就一齊過左F.1學年
 
我答應校長嘅事，我完全做到
 
我仍然係全級第一





好快到左F.1新生註冊日子，由於我住係學校宿舍，所以我可以第一時間見到新一班F.1同學
 
而今年，有兩個同學一入校已經吸引左我眼光。佢地係一對孖女，仲要各方面都係一模一樣，除非係佢地屋企人，否則係冇可能分到佢地