我是一個學界的灰姑娘: 47. 遇上前度男朋友

又過左一星期，我當日臨放學時，我係窗邊望見浩揚落左巴士
 
係巴士站到坐低等我
 
放學鐘一響起，我就儘快出校門去搵佢，以免俾其他同學見到
 
我快步走去巴士站果到，拍一拍佢
 
「喂!今日做咩事呀?星期五咋喎，應該一齊溫書」
 




「呀…今日有D想行街」
 
「有事?」
 
「咦!有車喎!上車先講啦」(陳年麥當當廣告)
 
佢拖起我隻手上車，但係我冇應承同佢去街架喎
 
車上邊已經有唔少同學係到
 




我同佢就坐係上層比較後，但總係會有上黎上層嘅同學見到我地
 
不過佢仍然捉住我隻手，完全冇放開嘅意思
 
所以我刻意搵野遮一遮住，然後想收返自己隻手
 
但係…佢唔放
 
我輕聲同佢講
 




「Ethan…Ethan…你俾返隻手我先啦」
 
「點解呀?」
 
「咁…呢到多人呀…又多同學」我面紅紅咁望住四周圍
 
但係佢都係唔肯放，所以我就唔再反抗，由得佢拖住。同時我個心又好開心
 
係中環落巴士果時，我地兩個下意識捉實大家
 
但係真係太多同學啦，所以落車行左陣我地都係鬆開手，果一刻我有D失望
 
「你…帶我去邊呀?」
 
「行街囉」




 
我地又去到銅鑼灣，我慣性行到去龍貓店果到，不過個音樂盒冇左啦。我有D失望之餘仲遇上一個人
 
我前男友，喇沙嘅Jason
 
果時Ethan去左洗手間，而我就獨自一個對住Jason
 
「Natalie?自己一個?」
 
「有問題?」
 
「唔需要咁冷淡掛?」
 
「你咁樣同我傾計，唔怕你女朋友嬲咩?」Jason身後出現左一個著St.Paul校服嘅女仔
 




「佢係你ex呀Jason?」
 
「係呀，佢叫Natalie」
 
「就係住係學校宿舍果個英華妹?」佢女朋友講
 
我住學校宿舍有咩問題?佢兩個真係天生一對，一樣睇唔起人咁款
 
「妳好，我叫Ceci」
 
呢個應該係有錢女啦，睇佢隻錶都似好貴咁款
 
「套長衫幾襯妳喎」
 
係囉，點解唔話埋我套衫好舊呀?




 
「Natalie妳仲係住宿舍?」
 
「有咩問題?咁你有冇同人講我以前係住劏房，係單親家庭，媽媽同爸爸係新移民?」我有少少怒氣沖沖咁講
 
「噢…大陸妹…」Ceci有少少嘲諷咁望住我講
 
「妳仲係全級第一?」Jason開始懶關心我
 
「有咩問題?」
 
「點解自己一個人係到行街?有野要買?」
 
「不如我地一齊行囉，多個人冇咁悶嘛」我覺得你地只係想係我面前示威，話俾我聽Jason揀佢係福氣咁樣
 




正當我想拒絕果時，Ethan交完水費返黎。佢好醒目咁拖實我。
 
「家琪，妳d朋友?」佢好溫柔咁問我
 
隻手乾嘅喂，有冇洗手架?
 
「嗯」我下意識雙手撓實佢
 
「你好，我係Natalie男朋友，我叫Ethan」
 
Jason係果種唔輸得嘅人，佢見到Ethan校章，可能心諗已經輸左少少，所以佢要同Ethan講，佢自己優秀d
 
係希慎廣場，出現左King屎仔加英華妹組合對上喇沙仔加St.Paul妹組合
 
「點解同Natalie黎行?佢唔太鍾意行呢d商場喎」
 
「唔係嘅，佢陪我者，我行慣誠品睇書，有時行商場都唔一定要買野嘅」
 
「係喎，Natalie住係學校，你送佢返宿舍怕唔怕麻煩?」
 
「係囉，英華女校校長好似好惡架喎」Ceci又加把口
 
「哦，唔怕，孔美玲校長嘛。佢係我婆婆，我媽咪係英華女校生物科科主任，訓導主任同我屋企仲要好熟。我可以自出自入」
 
「但係送佢返去唔怕麻煩?」
 
「我住堅尼地城，有時佢食完飯，我咪送佢囉。如果撞啱我爸爸唔洗飛，咪爸爸送我地返去囉」
 
「你爸爸係空少?可以成日唔洗飛?」
 
Ethan笑一笑同佢地講「啊，我爸爸係機長，有時佢飛到過哂時數咪留係屋企囉。飛機師成日飛真係好攰架」
 
Ceci可能聽到呢到就發現點都贏唔到我呢個佢口中嘅大陸妹，所以佢搵左個藉口就帶左Jason走
 
我同Ethan去到空中花園一個角落到坐低休息下，果時我先記得要問佢野