我是一個學界的灰姑娘: 59.小敏姐嘅另一面

「咩黎架!?」我拎去佢面前問
 
「呀…呢本……係…」
 
「咸濕漫畫!!!!係唔係?」
 
「係…」
 
「沒收!!」
 




然後又拎出第二本…第三本
 
佢真係成套漫畫儲齊喎
 
不過我估唔到嘅係…
 
「你…你連呢D都睇呀?」
 
Ethan望見本漫畫
 




「家…家姐呀!!!!妳過黎丫!!!!幫我解釋下啦!!!!」
 
好快，小敏姐入到黎「做咩事咁驚呀?」
 
「家姐…都話左妳d BL唔好放我房架啦…而家」
 
小敏姐姐望完之後，將本BL漫畫拎走，連同我沒收果套漫畫
 
「丫…好野喎，我地班搵極都搵唔到，浩揚你居然買齊一套喎，借俾家姐全班睇下啦」
 




咩話?我地學校head prefect係會買BL漫畫同三級漫畫睇嘅?
 
我跟住小敏姐出房
 
「小敏姐呀…會唔會唔太好呀?」
 
食住薯片嘅小敏姐回頭「嗯?妳想睇先呀?妳拎去啦，一陣還返俾我啦」
 
「我唔係咁嘅意思…」
 
「哦~唔夠呀?我仲有好多」
 
佢一手帶我去佢間房
 
小敏姐姐間房係完全少女風格，同佢係學校剛強形象係完全相反




 
佢床上有毛公仔之外，原來佢仲有好多裙、平底鞋、涼鞋之類
 
而佢個書架上，就有好多BL漫畫同埋少女愛情小說
 
嘩……瓊瑤…亦舒…岑凱倫…嚴沁…呢D好耐之前嘅作家D書小敏姐都有
 
原來我地學校嘅大家姐，私下係咁少女…
 
「做咩呀家琪?我睇呢D書好奇怪?」
 
「只係…同小敏姐妳形象…好似…」
 
「係學校一個樣，係屋企就另一個樣，係男朋友面前又另一個樣」
 




佢遞左幾本BL俾我睇
 
「拿，睇啦，唔夠我返學校再借俾妳」
 
「學…學校?」
 
「我收埋好多係姑姐到，佢仲多BL漫畫」
 
咩話!?我地班主任大白鯊會睇BL漫畫?
 
我打開第一頁…第二頁….之後就開始停唔到…沉迷左落BL漫畫世界中
 
我一口氣睇哂所有BL漫畫
 
然後小敏姐再借D小說我睇




 
有時候，睇下中文小說都幾好嘅
 
於是我就一邊睇小說，一邊監視浩揚執房
 
應該係話我同小敏姐一齊監視佢執哂兩間房
 
「嗯?你細佬妹呢?」
 
「佢地瞓緊呀」
 
「瞓緊?慧思對拖鞋明明係門口喎」
 
小敏姐彈一彈我個鼻
 




「傻妹，妳第一次係星期六日下晝黎我地屋企，一定有妳想像唔到嘅野睇架啦」
 
「有我想像唔到嘅野?」
 
小敏姐帶我去浩翹間房到
 
佢間房關哂窗簾之類，係地下，有兩對拖鞋
 
小敏姐指一指張床，明顯地係有個人係上面瞓緊
 
佢細細聲同我講「妳過去睇睇」
 
我依照小敏姐吩咐，靜靜地行過去…
 
我見到浩翹…同慧思兩個!?