從零開始的留班溝女生活: 3

Miss Chan佢竟然安排Tina坐喺我隔離，而且Amy仲坐喺我前面，今次仲唔發達。你問我嗰「五姐妹」去咗邊，佢哋五個坐喺課室嘅右邊（Tina、Amy同我坐喺左邊嘅前排），佢地五個人啱啱好坐一行，每人隔離坐一個男仔。我極度懷疑Miss Chan想全班同學人人有拖拍，如果唔係點會清一色男仔女仔一齊坐，不過我覺得做得非常好，始終做同桌好容易擦出火花，應該係抄出火花先啱。

我：「Hi，我叫Ken，你係咪叫Tina？」Tina一執好嘢坐低梗係以示禮貌打返聲招呼先。

Tina：「Hello，阿Ken，歡迎你加入我哋班。」我頂，串9我留班，不過我又係抵死嘅，見你靚女我大人有大量原諒你啦。

調完位之後落去聽校長9up，又可以補充一下睡眠，諗下陣間放學食乜好。瞓瞓下無端端電話震咗一震，睇下咩事先，原來係我升到上中四班巴打wts我。

Bob：「師弟陣間放學唔好走住一齊食lunch。」



Alex：「學校門口等。」

Hego：「食完有冇下半場？」

我：「屌你班粉皮，不如試下唔好串9我留班！得喇陣間不見不散！下半場陣間再傾啦。」

覆完班友仔，梗係把握機會瞓多陣。嘩咁快就坐咗兩個鐘，終於聽完條扑街校長喺到9up，年年都係講差唔多嘅嘢，佢不如索性拍條片每一年開學日播返出嚟咪得囉，等佢可以慳返啲口水。

聽完梗係放學，一出門口就見到三條粉腸企喺度大叫。



Alex、Bob、Hego：「師弟快啲行啦！唔係去到冇位嘅喇！」

我即刻送返隻質量數減質子（等於中子，呢個係中指先啱）比班友仔。

成班毒撚一齊食飯可以食咩，梗係食麥記。

Alex：「喂Ken哥，有冇d師妹好介紹?」

Hego：「係囉，我見d妹妹仔個個又大波又靚女，介紹d畀我哋識啦。」



我諗Hego一定係未見識過嗰五姐妹。

Bob：「識食一定食師姐，d妹妹仔留返比你哋。」

Hego同Alex雖然係我老死，但係古語有云：「朋友妻，咪走雞」，為咗防止呢兩條鹹濕仔搞我Tina同Amy，都係唔好俾佢哋知。

我：「見係你哋，就介紹個靚女畀你哋。」

呢三條友一聽到靚女就流曬口水咁。

我：「今日識到個靚女，佢係我班主任兼且中文科老師，佢叫Miss Chan，夠薑就去溝人哋。同學嘅話全部都係奇珍異獸，你哋咁揀飲擇食，一定唔會要。」

我仲以為班友會好型噉樣話Miss Chan佢哋溝硬，點知個個都係淆底獸，唔夠膽去溝miss。

就喺我哋一路吹水一路𥄫女嘅時候，我見到Amy一個人喺麥記門口行過，好似行得好急咁，出於八卦我決定去睇下乜事。



我：「兄弟們唔好意思，老母買餸買餸買多咗唔夠手拎，要我幫手。我先行告退。」

求其作個籍口應酬佢哋，我下次都係要睇下Amy佢搞乜，順便可以認識下人哋。