美好世界的沉思者/ADVANCING (重製): 8. 滿天繁星

第二日返到學校，阿雯就係櫃桶度攞咗枝嘢擺咗係我枱面。

「你飲下。」

我望咗佢一眼就攞起枝嘢拎開個蓋，飲咗啖，㗳咗幾下。

「嘩！咩嚟架？！」

「羅漢果水呀～特登整俾你架，潤下個喉～」





「咁多謝晒喎！」

「嗱～你宜家攞咗我份禮，今日一定要表現好啲，再入決賽架！」

「原來有陰謀嘅！唔怪得咁好死啦！」
「好啦！我會盡力架喇！」

成日入面每一堂，雖然外人望落去我係聽緊書。但雖然望落去係咁，腦入面其實係諗緊啲舞步同歌詞，再複習多次。

睇返我班朋友，他哋就響度好勤力咁抄筆記，聽老師講嘢，或者我真係唔勤力。





轉眼間就放學，而第三日嘅初賽日亦都正式開始，每個人都一路執嘢一路討論今日嘅初賽同埋同我哋加油。

講錯，係同阿霆講，我哋冇份。
「霆霆，加油呀！」「男神，你一定會贏架！」「霆bb，呢條手繩係我自己整架，你戴住佢會帶俾你幸運架！」

聽到呢啲「霆霆！」「霆bb！」咁啲稱呼真係想嘔，又肉麻又怪。

我哋約齊12個人就一齊去集合點。而阿雯同埋一個女仔都跟埋我哋去，個個女仔叫娟姐，係志偉嘅女朋友，我哋嘅阿嫂。





去到之後首先就開咗聲先，跟住拉筋，而阿娟就係一邊準備首歌嘅音樂，俾我哋一陣間跟住唱跟住跳。

「Hello，你係咪就係今年新個個插班生呀？」

「係呀，我叫阿雯。」

「我叫阿娟，啲人都叫我都娟姨，我係志偉嘅女朋友。」講住佢就指住志偉。

「一齊咗幾耐呀？」

「今年第三年。」
「你呢？你又係邊個女朋友呀？」

「吓？！」
「冇...冇呀！」佢聽到即刻耍手拎頭。





「講下笑距～不過...你咁騰雞...唔通...」

「暗戀。」講呢句講陣娟姨仲要特登哄埋阿雯嘅耳邊講。

「冇呀冇呀！我真係冇暗戀呀！」

「睇吓你吖！咁騰雞仲話冇～」
「應該係阿霆啦，校草嚟喎～呢間學校冇女仔唔鐘意佢架，除咗我。」
「唔講喇，睇佢哋rehearsal啦！」

我哋排咗幾次之後就休息下等過去禮堂。

「頭先你哋講咩呀？」埋到去我就問阿雯。





「冇呀。」

「冇？見你哋好好傾咁喎。」

「朋友間閒談下啫...」

好快就收到消息宜家禮堂第七組準備緊，我哋就即刻執齊嘢一行14人一齊行去禮堂。

到咗之後，個人就更緊張，估唔到個場有咁多人，周圍都坐滿晒人同企滿晒，人山人海咁，而評判席就響班觀眾嘅前面。

第七組表演完畢，過咗幾分鐘之後老師就叫第八組上台。

「加油！」上台前，阿雯、娟姨同側邊一啲其他嘅同學老師都向我哋全部人，冇錯，真係同晒全部12人講加油。

每一步都極度沉重，大家都企好晒，我就合理眼深呼吸冷靜下，同時等音樂響起，過程中仍然聽到台下一眾觀眾嘅打氣聲。





「男神加油呀！」「男神一定要入決賽呀！」「霆霆bb你一定得架！」「霆霆唔好緊張，唔好忘記我一直都會陪住你架！」

每一句都係為阿霆加油，我哋係冇份嘅，可能有，但被阿霆嘅遮晒。

「噓噓噓！靜一靜！」老師係播音樂前開咪叫大家靜啲。

Mirror嘅Reflection音樂響起，我哋12人亦跳起舞。