美好世界的沉思者/ADVANCING (重製): 10. 理想鄉

好早起咗身之後梳洗完就準備出門口。

我哋約咗1點鐘係樓下巴士站度等，所以搭9就落到去等，無謂要女仔等，而且之前我都曾經同佢約咗但係遲咗。

過咗1個字左右，阿雯就到咗。

「咁早嘅你？約1點喎～」

今日佢著咗件白色嘅蕾絲裇衫，搭配條黑色熱褲，黑襪仔，白色波鞋，完美咁展露佢個對又白又滑，沒有一點瑕疵嘅長腿，令我大飽眼福。





「望夠未呀，戀態佬？」佢用手指抬起咗我個頭，我對眼由望住佢對腳變成望佢個清秀亮麗嘅臉孔。

「呀...Sor。」
「咁早嘅？都未夠1點。」

「費時要你等嘛～而且我又唔係港女，唔會化妝襯衫搞成幾粒鐘囉。」
「點呀，食咩呀？」

「平平地，食茶記？食完我哋去行街。」





去到我都係叫咗滑蛋牛肉飯同熱奶茶，而阿雯就叫咗咖喱牛腩飯加阿華田。

食完飯之後我哋就搭車去九龍灣行街。

「戲院喎，去睇吓有咩睇咯～」

「好呀！都好耐冇睇過睇喇我。」

入到去我哋就即刻走過去塊板前面睇吓今日有咩戲睇。





「呢套幻愛呢我上網睇啲人話好好睇。」

「唔...咁啱一陣3:30有一場，宜家仲有大概8個字，買飛？」

之後我哋就去買飛，等緊個陣我哋去咗附近嘅商場行街，睇吓衫呀鞋咁樣，仲會陪佢去睇化妝品同護膚品，可能因為今日係假日嘅關係，商場特別多人，去到水洩不通嘅情況。

係等緊阿雯買野幾時候，我冇野做就周圍望下。點不知俾我見到好多男人見到阿雯嘅時候都會眼甘甘咁望住佢對腳，就算行過咗，都會拎轉頭繼續望。

我隨即就除咗件外套落嚟綁係佢條腰度，遮住佢大脾。

「做咩呀？」阿雯見到我呢個舉動就問我。

「天氣凍。」

「哼～」





返到去戲院我哋就先去個廁所先至入場睇戲。

睇到中間，我留意到阿雯佢挨咗落嚟我膀頭係度喊，喊到我件衫濕晒，而我之後都開始喊咗出嚟。

「唔好意思，搞到你件衫濕晒～」睇院套戲阿雯先發覺到佢喊到我件濕咗。

「唔緊要，好快乾啫。而且我都喊咗，套戲真係好好睇好感人嘅」

我哋搭咗架巴士過去港島食飯，可能睇完戲太攰，阿雯上咗車冇耐就瞓咗，而我就一路拖住佢隻手，一路聽歌，一路望風景。

到咗之後我就帶咗佢去一間食西餐嘅地方食飯。

「嘩，呢度好高級咁喎，會唔會好貴架～」





「放心啦～」

坐低咗之後就開始睇餐牌，最後我哋就傾咗叫咗個二人晚餐。

香港人精神就係手機食先，係每一樣嚟到之後，阿雯都會用手機影咗先再用個口嚟品賞。

「我咁大個女第一次食西餐咋～多謝你呀～」

「我都係第一次咋～我一直都好想試，睇戲覺得個氣氛同格調都好優雅好華麗，同時又浪漫。」

「我都覺！」

食晒前茶，湯，主菜之後就到甜品。

「你做咩唔食呀？」阿雯食住佢手上嘅窩夫問我。





「我唔好甜嘢架～」

「咁我唔客氣喇！」佢一攞到即刻就開動，十足十餓狗搶食。

食完賣咗單我哋就搭返車返屋企，而今次就係我係車上面瞓咗。

「遲到返學喇！仲唔起身！」

我懞住眼起身睇返周圍，先知自己唔係係屋企要準備返學，而係係巴士上面返緊屋企。

摸咗下嘴角發現仲流埋口水，出醜喇！

呢刻阿雯递咗張紙巾俾我，抹咗個嘴再抹埋隻手就落車埋去。





呢一個美好嘅一日亦都完結。