美好世界的沉思者/ADVANCING (重製): 16.「無間」之始
去到第二日，亦即係阿雯生日嘅當日，今日個生日派對約咗係旺角嘅一間派對房間，約定時間係下午5:00。所以我都特登瞓耐啲，養足精神咁到時候就可以玩成晚。
「叮叮叮叮叮～」手機傳出咗鈴聲。
「喂～」我帶住疲倦接聽咗個電話。
「醒未呀？！」
「邊位呀～」
「仲瞓緊呀？！宜家4:00喇！」
4點？
「你唔好唔記得！今日係阿雯生日呀！」
生日？係喎！今日約咗5點鐘個喎。宜家4點，即係得返一粒鐘，死！
「瞓過龍添！」
「終於醒啦嘛！你幾時落到嚟？！」
「4:30？」
「4:30你都未得我哋就唔等你！」
我即刻收線起身，但係邊有咁易，起咗身緊係避免唔到係張床度賴下啦。
賴咗一陣，個人終於都醒返啲我先落床去沖涼洗面刷牙。搞掂晒之後我就即刻頭都唔吹就走去換衫。
隨便抽咗幾件出嚟之後我就換上身。呢個時候又有人打俾我。
「喂？」
「4點半喇～你點呀？」
「er…你哋去先啦！我之後到！」
「你識路架嘛？」
「識！緊係識啦！唔使擔心我喎～」
「咁得啦，到時見！」
既然都遲，我就重新揀過衫。咩都搞掂晒我就開始吹頭，唔使好耐就乾晒。
最後攞埋禮物我就起程。睇睇時間先，不知不覺搞咗咁多嘢已經差唔多5點鐘，我就一路行一路搵的士。但個天好似玩我咁，行咗勁耐架架的士都車咗人，一架空車都冇，最後要行去的士站先至有車。
搭咗幾個字終於到咗目的地，我俾咗錢就即刻落車然後開住個地圖跟住嚟行。
「咁耐架！」上到去撳咗鐘，阿霆就行咗過嚟開門。
「遲起吖嘛～佢哋到晒喇？」
「仲差阿雯同琳琳。」琳琳係我哋班嘅一個人，但我同佢唔係好熟。
入到去我除咗對鞋就行入去。
個場唔係好大，一眼睇晒，有波波池，有卡啦ok，有遊戲機，仲有啲公仔。
「你哋玩緊咩呀？」
「踢波呀，你玩唔玩？」
「唔識玩喎。」
「玩玩下就識架啦！」
「咁我試吓啦。」
我攞到個手制傑仔就教我撳制，邊粒係射波、傳波、偷波、鏟波咁樣。因為我完全唔熟啲球隊，所以我係亂咁揀咗一隊足球隊就同傑仔開波。
講咗啦，我係完全唔識踢足球，打足球game我都唔識，所以淨係識一味一條友帶過去對面射波。但傑仔就打得好叻，所以係完全大炒我，好彩就偷到雞入到一兩球，但其餘時間莫講話入波，射波都冇機會。
「好唔掂喎，咁水皮架！」
「都講咗我唔識玩架啦！」
「咁轉過隻囉～呢隻點？」傑仔攞咗第二隻遊戲俾我睇。
「但呢隻最多4個人玩咋喎。」
「咁咪啱囉，阿霆係個度俾啲女煩住都玩唔到架啦。」係波波池個度，雖然眼睇阿霆係同班女仔係度玩緊，但睇得出得班女仔享受緊。
「威威！志偉！打機呀！過嚟吖！」
「娟娟，我去打機先啦。」志偉同娟姨講完就過嚟同我哋打機。
呢係一隻破壞友情嘅遊戲，首先四個人揀隻角色，大家每一局嘅目標就係到達終點。而每一局都會有一啲道具俾我哋揀，可能係協助性，可以係陷阱，掂到就會即刻死，分數最快達標嘅就會贏。之於點解係會破壞友情？就因為往往都會揀一啲陷阱嚟阻住其他人去終點，又可以有機會用炸彈炸咗其他人嘅陷阱。係一隻又歡樂又邪惡嘅遊戲。
「叮咚～」突然門鐘就響起。
「哈囉～」係阿雯同琳琳佢哋，手上面仲攞住炸雞同一啲薯條同埋薯格。
「生日快樂！」我哋所有人一齊異口同聲同阿雯講生日快樂。
「多謝～」
「我哋買咗啲炸雞上嚟食，大家快啲過嚟食啦～耐咗就唔好食架喇～」阿雯同阿琳攞住啲食物擺上枱面，我哋都暫停咗隻game去食嘢。
「你哋頭先係我唔響度個陣做咩呀？」食緊嘢個時阿雯走過嚟問我。
「都係打機唱K囉。你打唔打呀？」
「一陣先，睇吓有咩game玩。」
「你份禮物呢？」
「我有買架！擺咗喺個度呀！」我指咗指側邊推禮物。
「好彩你冇唔記得啫！」
「希望唔好令我失望啦！」
「一定唔會！」我好有自信咁講。
「阿雯，一齊唱歌喇！」另外有一個我唔識嘅女仔過嚟搵阿雯唱K。
「我唱歌先喇～拜拜～」
我食完嘢就去繼續頭先嘅遊戲，過程中爆發咗唔少嘅笑彈。有人跳極都跳唔上去舊木度過去終點；有人玩朵花卻唔小心俾朵花打中；有人被前後兩個陷阱夾擊，係咁跳嚟跳去避陷阱。
「Yeah！贏咗。」玩咗幾局後勝負就分出咗，贏嘅係傑仔。
「唉～唔玩！玩其他野！」
我哋去擺滿晒board game嘅架度搵下邊隻有趣，最後就揀咗隻叫又係要團體合作嘅遊戲。呢隻遊戲係分兩組，一個人做建築師，一個人做建築工人。建築物就要透過一啲特定語言同動作嚟發放指令，等建築工人可以起到指定嘅建築物。
我就分咗同志偉一組，傑仔就同威威一組，我同威威就做建築師。我哋都決定咗大家都起個5分嘅建築物嚟一局定輸贏。
玩完呢隻遊戲，我發覺原來志偉係蠢材嚟，我明明已經照住啲指令做啱動作講啱嘢，佢都可以攞錯積木又擺到錯晒。雖然隔離個組都唔係好我哋好多，但人哋起碼最後都完成到，我哋就擺得個一舊，諗係都嬲呀！
「你有冇睇個指令牌架？我照住晒上面做動作講嘢你都唔明！」玩完隻game我即刻搞問責制。
「sorly sorly～」
「你哋玩緊board game呀？」「join埋得唔得呀？」隔離阿霆仲有幾個女仔行過嚟。
「好呀！多啲人好玩啲！」威威即刻應承佢哋俾佢哋join。
「咁不如加多個大懲罰，輸咗個隊所有人都要罰！」
「罰咩先？」一講到罰咩我哋所有人都唔出聲，諗罰咩好。
「...我諗到！一於就大雜燴！準備一杯嘢，贏嘅想加咩都得！」中間一個女仔出咗聲。
「吓？！玩咁大？！」阿霆聽到之後即刻打咗個突。
「你玩贏咪得囉！呢個懲罰幾好喎！就咁決定啦！分組！」
最後我，威威，琳琳，欣欣一組；志偉，阿霆，傑仔，詩姐一組，而充當建築師呢個重要人物嘅就依然係我，另一組就係詩姐。
話咁快30分鐘就過去，我哋兩組係計晒我哋有嘅卡嘅總分之後，得出咗個結果。
18:17，我哋以一分之差成功擊敗對手！唔使接受懲罰！
經過我哋一番精心炮製後，4杯嘅大雜燴終於整好咗，有可樂、辣醬、芥末、檸檬汁等等。
佢哋4個每一個人都望住杯嘢遲遲都唔擺入口，我哋就不停催佢哋。
真男人嘅阿霆同志偉一口氣飲晒成杯嘢之後就一齊衝咗去廁所度嘔出嚟，威威就入去睇吓佢哋咩情況。
「傑仔，差你咋！」當然除咗佢，詩姐亦都遲遲未放入口。
傑仔一手攞住隻杯，一口氣飲晒，佢面色即刻轉差，強忍住呢種嗆鼻同辛辣感夾硬吞咗落肚。接住，佢再攞係側邊詩姐杯嘢一下飲咗佢再吞咗佢。即刻，佢個鼻紅晒，出晒眼水，仲有啲想嘔，就即刻沖咗入去廁所。
我哋都係度為佢呢個舉動感到驕傲，估唔到會幫女仔頂懲罰喎。
「喂，差唔多喇。」呢個時候琳琳細細聲同我講，我再睇睇我隻錶，我哋都已經玩咗好耐，係時候要進入今晚嘅正題。