美好世界的沉思者/ADVANCING (重製): 0.2 我
「返去喇。」佢喊完之後就一齊返去。
一路上我好想同佢講我嘅真實諗法，但我鼓唔起勇氣，我驚佢會因為咁而嬲咗我，驚件事變到無法挽回嘅地步。
但夢入面嘅內容一直纏繞住我，係我腦海之中一直揮之不去。而佢所講嘅一直都耿耿於懷，我一直都糾結於邏輯之中。
「我行呢邊...」不知不覺間，我地已經行到分叉路，佢要返佢嘅屋企，我要返我嘅屋企。
「嗯...再見...」
望住佢離去嘅身影，我竟然會有不捨嘅感覺，明明只係普通嘅一個暫時嘅分開，明知仲會再見，但竟然會感受離別嘅痛楚。
去？唔去？
或者夢終歸係夢，或者我應該相信佢，或者我應該把握現在。
莫自卑，莫自欺。
「阿雯！」我向佢嘅背影大嗌。
「?」佢帶佢疑惑嘅表情望轉頭。
「...我...」
「不如...返我屋企...我想...食你整嘅野...」
「...」
佢聽到之後隨即笑顏逐開。
「笑咩呀?」
「...咁行啦...」
「...嗯!」
我即刻拖住佢隻手一齊上我屋企。
—————————————————
「你屋企咩都冇喎，仲話叫我整。」
「我落去買餸，你乖乖地等我。」
呯!
「!」
我即刻㩒住佢打開咗少少嘅門，從後壁咚佢。
「做咩呀?...哦～」
「...你想嘅話...今晚先啦...」佢一路講一路含羞答答咁。
「但...我想而家喎～我已經好餓，叫外賣啦～」
「下?」佢聽到之後好錯愕。
「但你又話想食我整嘅野?」
「今晚先啦，啱啱先返嚟，唔好再出去喇。」
「咁今晚先煮都要餸架，你有咩?」
「...」咁佢又啱嘅。
「放心啦，我好快返。你叫住外賣先啦。」
「拜拜喇！」
—————————————————
「嘩～餐飯真係好好食!好想日日都食到。」
「你乖啲咪日日都食到囉!」
「我洗埋啲碗就走啦。」
「我洗得啦，餸又你買餐飯又你煮，我都要做啲野嘅。」
「咁...好啦!我休息下先。」
「係喎，你考完試有咩做呀?」
「嗯...下個月同阿傑佢地去旅行囉，做咩呀?」
「咁...你呢個月呢？」
「都有呀，要陪我女朋友。」
「你識咗個新女朋友？！」
「邊有啫，我女朋友一直都係個個，叫溫綺雯。」
「我有話同你復合返咩？」
「不過...呢半個月你想我陪...都得嘅～」
「咁我好有信心你好～快會同我一齊返！」
「洗！完！」
「洗完咁我走喇，聽日再見啦。」講完佢隨即就去到門口準備要走。
「下?」
「咩呀?仲有野做？」
「...唔係呀...」
「你...可唔可以留低?」
「...」
「唔得唔緊要嘅...」
「!」佢突然轉身攬住咗我。
—————————————————
「你攪住我吖。」
「...嗯。」
係床上面，我地面對面咁攬住一齊訓。
但唔知咩事，我久久未有入睡，可能呢個感覺太陌生。
我決定鬆開雙手，轉身，換個睡姿等個人好訓啲。
「做咩呀?」
「下?」點知俾我發現原來佢都仲未訓。
「唔想咁一早講嘛」講完佢都轉身背對住我。
「唔係，我唔係唔想...」我重新從後將佢抱住。
「...」
「雯，我...我鍾意你。」
「對唔住，我隔咗咁耐先修補我地之間嘅關係，但...我係真係鍾意你，我只係驚...我驚...」
「唔緊要啦，過咗咁耐，而家一齊返咪得囉」
「...不過你唔好諗住扔低我呀，我唔會放你走架!」
「咁睇嚟死先可以放低呢個包袱。」
「你就想呀!幾生幾世都會跟住你!」
「仲有!咩包袱呀?!我係負累咩而家?」
「sorsorsor! 講錯!」
「不過...放心啦!你幾生幾世都會係做少奶奶，我負責養你，而你就...負責享受生活就得喇!」
「我先唔要!做少奶奶咁辛苦，成日都要應酬，又要同啲權貴打交道，淨係諗起啲勾心鬥角就攰。」
「但我唔想你同我一齊挨，我唔想你辛苦，我想你生活無憂...」
「挨咪一齊挨囉...最緊要一齊!」
「但我怕...」
「賢呀！唔好咩都怕啦！挺起胸膛面對一切困難啦！你就係成日逃避先令我受咗咁耐苦咋！同埋未來係點冇人知，最緊要活在當下。」
「對唔住...」
「而家見得返你我開心返晒，之前個啲對比起呢個時間都不再重要。」
「我知你諗咩...不過你要知道，重要嘅並唔係我生活有幾好，有幾多錢，或者住洋樓養番狗。重要嘅係我地係埋一齊，即係只係平平淡淡嘅生活，都足夠幸福。即使係要挨，有你陪係身邊，苦都變甜!」
「歌仔都有得唱啦，『有了你開心D，乜都稱心滿意，鹹魚白菜也好好味』～」
「好難聽...」同時我都感動到留下淚。
「不知幾好聽！唔識欣賞～」
「...Thank you! I love you!」
「溫綺雯，可唔可以做我女朋友？」
「可以！我愛你！I love you 3000 雲建賢！」
「...! 做咩呀？咁快就想用力「愛」我喇？」
佢唔講我都唔知，我嘅下身出現咗變化令佢察覺到，既然係咁...
「係呀，我想盡快向你表現我對你嘅愛。」
「咁你要表現到聽朝呀！唔係我唔會放過你！」
「我對你嘅愛點至聽朝！永遠呀！」