性交轉運打喪屍: （18）

「…全港多處地方發生人咬人事件，有大批失控嘅市民，到處無差別襲擊途人…」

電視播放緊即時新聞，報道話港九新界各處，都出現人咬人嘅情況。

「目前警方已連同其他紀律部隊合作處理事件，為保障人身安全，政府促請市民如非必要，切勿外出，同時政府亦表示會盡一切努力平息事件，以及保護市民，呼籲各界無需過分擔心…」

新聞男主播呢頭講完政府會保護市民，叫人唔好擔心，嗰頭就有兩個全身血淋淋嘅人衝入鏡，擒住佢嚟噬。

鏡頭就咁影住兩條友活生生咬死男主播。



肢解、噴血、尖叫，一應俱全，唔講仲以為自己睇緊喪屍片。

然而，喪屍片嘅喪屍係假嘅，呢班卻係真嘅。

電視台後知後覺，過左好一陣先切換畫面，轉去播放一啲街上喪屍咬人嘅片段。

有片段影到尖沙咀海旁有大班喪屍，聯群結隊追住幾個中學生嚟咬，喺女人街幾個紋身漢，拎住鐵通、西瓜刀同喪屍埋身肉搏，仲有西貢嘅郊區公園以致離島都影到喪屍出沒。

「這…這是什麼一回事…」



娟姐行到出廳，睇見電視上嘅畫面，完全o曬嘴：「這是…拍戲嗎…」

我都好想答佢「係」，可惜事實係呢一切都係珍珠都無咁「真」。

「叮！」 手提電話響起短訊提示音。

政府發送過嚟官方信息，呼籲市民盡量留在安全嘅地方。

其實出面咁危險，正常人都唔敢亂咁出去。



問題係避得一時避唔到一世，政府話就話會盡快解決，但有無能力解決都係一個未知之謎。

尤其諗起頭先條廢柴差佬，揸住槍都搞唔掂隻喪屍，要旨意佢地，難免會為未來感到悲觀。

我嘆一口氣，熄左電視，無心情繼續睇落去。

老豆條屍仲攤左喺廚房，我同娟姐搵兩個大嘅垃圾袋，笠住老豆嘅頭同腳，然後夾手夾腳搬佢出門口。

對於老豆嘅死，我並無特別難過，畢竟我同佢嘅關係不嬲都好差，無乜感情可言。

家陣佢死左，以後反而唔洗再督眼督鼻。

落手劈瓜老豆嘅娟姐，亦無顯得特別難過。

平時老豆當佢工人咁呼呼喝喝，郁啲就鬧，有時仲會郁手，我諗娟姐心入面早就積積埋埋，積落好多怨氣。



頭先佢落手咁重，斷估係忍無可忍，決意將怨氣一次過發洩出嚟。

講真，如果唔係多得佢果斷出手，瓜老襯嗰個隨時係我。

合力搬老豆條屍出門口之後，娟姐話出左身汗，同埋身上仲有血跡，所以想沖個涼，順便換返件衫。

疲倦嘅我就坐落梳化攤抖，碌下電話。

呢一刻，基本上整個網絡世界，鋪天蓋地都係關於喪屍嘅新聞同消息。

「『運滯』，『典』解花灑突然無『易』水嘅？」

娟姐沖涼沖到半路，探頭出廁所問我。



「無熱水？」

「係呀，『梨』入嚟睇下咩事。」

「你著返衫先，我跟住就入嚟。」

應娟姐嘅請求，我入廁所幫手睇下咩事。