性交轉運打喪屍: （38）

外面嘅大雨已經停左，太陽都出埋嚟。

一出門口，我就立即轉左，打算往屋企方向逃跑。

身邊嘅Isabel就話：「喂你傻q左呀，你見唔到嗰邊有喪屍？」

我停下腳步望向前，遠處的確有一堆喪屍，跟住掉轉頭行去相反方向，點知又係有一班喪屍堵塞前路。

除左左右兩邊之外，連前面對面馬路都有喪屍，加上後有追兵，感覺完全無路可走。



「無路走呀，上車啦！」Isabel指住停泊喺馬路邊嘅一架法拉利。

車身紅噹噹、車頂無遮無掩，唔難認出係Jason部跑車。

車上面嘅座位濕滴滴，Isabel無理咁多，快手就跳左上車。

呢個時候我都別無他選，跟埋佢上車。

成部車得一個司機位同一個乘客位，先上嘅Isabel坐到乘客位，我後上就坐落司機位。



「弊傢伙！無車匙！」Isabel𨂽地驚呼。

「車匙？你係咪指呢條？」我從褲袋拎出嗰舊黑色法拉利車匙。

「咦，點解你有嘅？」

「頭先我問Jason拎廁所鎖匙，唔知係咪high過龍，無啦啦連條車匙都俾埋我。」

「咁你仲等咩呀？開車啦！Go Go Go！」



「Er…我...我唔識揸車…」

「Oh My God！as一個男人，你居然唔識揸車？Are you serious？」對方語氣高八調。

「邊個話男人一定要識揸車，你係識嘅話，咁不如我地換位，你嚟揸。」

「Sorry，我都唔識。」

「下？你又唔識？咁點算好呀？」

喺我地拗緊嘅同時，幾十隻喪屍正從四面八方行埋嚟，我地呢刻嘅處境岌岌可危。

Isabel就答我：「仲有點？你咪照揸囉，不外乎踩下油門扭下軚盤咁，都係手板眼見功夫嘢嚟啫！你快啲撻車啦！」

「真係得咩？咁隨時炒車架喎！」



「Come on！唔得都要得啦，你自己睇下啲喪屍，就嚟殺到啦！Hurry up！」Isabel催促。

佢無講錯，的而且確，啲喪屍距離我地已經好接近。

尤其前面嗰一班，再行前多二十米，就會嚟到我地面前。

雖然我唔識揸車，但喺呢個關頭，點都係要頂硬上，寧願炒車都好過俾喪屍咬死。

我將車匙插入車匙窿，擰一擰，隨住引擎聲響起，部車成功撻著左。

不過啱啱撻著，部車就立即向前標出去。

剛上手嘅我未揸實軚盤，亂咁扭左扭右，結果架車一時之間方向不定，左搖右擺。



「嘭！嘭！嘭！嘭！」

架車一連撞開三隻喪屍，再撞爆路邊嘅消防喉，跟手再撞斷欄杆，鏟埋上行人路。

「啊！！！」旁邊嘅Isabel驚慌尖叫，「喂喂喂！轉彎呀！」

架車一路直去，駛到石壆前，眼見就嚟撞埋去，我先急忙擰軚轉右。

沿路上嘅路牌，鐵欄、巴士站牌等等，基本上俾我撞爛曬。

之後轉入一條馬路，路上有唔少停泊，甚至係翻側嘅汽車。

我瘋狂擰軚閃避，但好多時都係避唔切，導致架車左碰右撞，嚇到我都唔敢擘大眼。

至於Isabel一直喺隔籬瘋狂尖叫，我耳膜都幾乎震穿埋。



「前面呀！撞啦！快啲收油！」Isabel扯住我件衫，猛叫我收油。

前面成條路都係因維修而封左路，撞埋去肯定炒獲勁。

但我淨係識踩油唔識收油：「收油？點…點收呀？」

呢頭講完，嗰頭成架車就已經撞埋去，車頭撞跌啲曬磚頭、鐵欄，跟住又唔知碌到啲咩，搞到成間車飛起左。

「啊！！！」Isabel高聲尖叫。

我個心亦都嚇到離一離，驚到唔敢嗌出聲。

一秒之後，架車「砰」一聲「櫈」返落地，然後失控自轉，頭尾周圍撞，好似個陀螺咁撞走街上啲欄杆、喪屍、雜物等等。



「快啲剎車！剎車呀！」Isabel失聲大叫。

我轉到暈陀陀，好想剎停架車，但唔識點做，唯有就乜都試下。

試下拉隔籬個手掣，又試下㩒個軚盤，又踩下地下另外一啲腳掣。

結果架車轉左唔知幾多圈，跌跌撞撞，最後正面撞到一個路邊建築棚架，與此同時亦都終於剎停左落嚟。

好彩停得切，否則如果繼續衝前，就會成部車撞入去間西餅鋪度，隨時車毀人亡。

人生第一次揸車，沿路上碰碰撞撞，險象環生，但係咁都死唔去，總算幾命大。

我大啖鬆一口氣，慶幸自己又逃過一劫。

本身仲想拍拍心口定驚，只不過隻手啱遞高，忽然之間，有一碌長竹「嗖」一聲，從棚架上垂直插落嚟，直接喺我面前略過，然後貼住我褲浪位刺穿座椅。

我望住面前碌竹，嚇到呆左，額頭流左兩滴汗。

頭先只要我個頭移出少少，咁支嘢就會垂直插爆我個頭。

好彩差少少，真係差好少好少。