性交轉運打喪屍: （50）

Isabel成個癡女咁，衝埋去肌肉男面前，仲忍唔住摸人地結實嘅二頭肌：「Hi，你好有型好大隻呀！」

肌肉男卻縮一縮，尷尬一笑：「哈，多謝！」

Sandy都圍埋過去：「呢位先生，你真係好犀利！求下你幫幫我！我個妹依家困住喺城大，你可唔可以同我地一齊入去救佢？」

「哇！咁大獲？女仔之家喺出面好危險架喎。」

「係呀，所以求你同我地一齊去救佢，只要你救得到佢出嚟，我願意以身相許！」Sandy又出動呢招。



「咁又唔洗！我份人平時最鐘意就係幫人，所以無問題呀，我可以跟你入City救你個妹，反正我啲屋企人、朋友都變曬喪屍，得我自己一個，除左放狗之外都無乜嘢做，既然係咁，一於就幫下你，做返件好事都好！」肌肉男一口答應。

「哈哈！太好啦！有你喺度保護我地，咁一定好安全。」Isabel繼續向肌肉男放生電。

旁邊嗰三條宅男見自己俾人搶曬風頭，個個都黑曬面。

「係啦，講左咁耐，都未知你叫咩名？」Isabel問。

「平時我地環頭啲手足，個個都叫我『楊過』。」



「嗯？唔通你係差人？」Sandy問。

楊過搖搖頭否認：「我係消防員，平時守喺馬頭涌消防局。」

「但點解又會叫楊過咁得意嘅？」Isabel挨身挨勢，不停暗送秋波。

楊過個樣就尷尷尬尬，有啲口窒窒：「Er…因為我鐘意『姑姑』（咕咕）。」

「咕咕？咩咕咕？」Isabel聽唔明。



「咪即係『咕咕』囉。」楊過再將讀音發準一啲。

Isabel終於聽得明箇中意思，眼神隨即流露失望：「乜你原來鐘意男人…」

另一邊廂，三個宅男得知少左一個強勁對手同佢地爭女，立即就鬆一口氣。

「算啦，我地唔好講呢啲啦，事不宜遲，我地快啲上車入城大啦。」Sandy心急如焚。

「肥仔唔喺度，我地依家無人識揸車喎。」戴帽男話。

「係囉，咁點算好？」瘦仔問。

「唔識驚，我識揸，我屋企就喺呢頭，架車救停左喺屋企樓下，不如坐我車過去啦。」楊過對大家講。

「咁就太好啦！」Sandy拍手稱好。



一直做花生友旁觀嘅我，呢個時候就衝上前問楊過：「咁…咁你架車有幾多個位？」

「係架七人車，我諗應該啱啱好，裝得曬呢度咁多個人。」楊過答話。

「Yes！」我放下心頭大石，開心到嗌左出嚟。

好彩遇到一個架車有多啲位嘅人仕，咁先唔洗俾人瀨低，真係天無絕人之路！

「咁大家就跟住我行，好近架渣，好快就到。」

楊過帶頭先行，我地幾個就跟住佢。

路程雖然唔遠，但卻遇到左喪屍。



前後加埋遇到三隻，每隻都俾帶頭嘅楊過輕鬆咁一一搞掂。

搞掂嘅意思唔係殺死，而係好似頭先送走肥仔咁，送走曬啲喪屍。

老實講，以佢嘅身手，根本就可以一拳打死一隻喪屍，但佢就堅持唔殺，真係有啲俾佢吹漲。