性交轉運打喪屍: （58）

就咁兩手fing fing行出去，十分危險，所以臨離開前，一定都擸返啲嘢旁身。

眾觀成間實驗室，用得著嘅嘢似乎唔多，我又唔識學個鬼佬咁，將啲化學物品左溝又溝，溝到變炸藥。

最後揀嚟揀去，就得鐵鉗拎得落手。

剛踏出門口，果然又遇到兩隻喪屍。

我有曬心理準備，反應都已經夠快，無諗到對面更加快。



佢地一嚟就一人一邊，捉住我雙手。

兩個對一個，仲要我未反抗就已經被鉗制。

由入嚟城大到依家，我幾乎無一刻認真休息過，家下手腳都軟，掙扎都用唔上力。

儘管如此，但都不能輕易放棄，幾攰都好，都keep住咁擺手fing腿，努力掙脫。

然後無離啦肺，頭上無端端跌左隻簷蛇落嚟，正中落我塊臉度，隻嘢仲要鬼死咁大隻。



呢條大壁虎驚嚇程度不下於喪屍，嚇到我狂咁fing手，終於一隻手fing甩左出嚟，成功擺脫右手邊嘅喪屍。

嗰隻喪屍想立即捉返住我，只係突然之間，有一道不知名嘅綠光，從側邊飛去佢個太陽穴。

下一秒，喪屍個頭好似西瓜咁，成個爆開。

腥臭嘅血漿同濃濃嘅腦汁，噴到我一面都係。

臉上嗰隻簷蛇仲未肯走，爬埋上我頭頂度。



我連臉上啲血都唔抹住，想快手整走隻「四腳爬爬」。

剛舉高手，就出現第二道綠色激光，喺身邊掠過。

綠光無中到我，亦都無中隻喪屍，射左落走廊後面幅墻度。

然後「BOOM」超強力爆炸，成幅石屎墻炸到碎曬，威力仲勁過頭先鬼佬自製嘅炸藥。

而呢種咁猛嘅爆炸聲，令我諗起之前喺大門口天花板樓上，聽到嘅嗰下爆炸。

當我回過神來，面前出現一個好奇怪嘅人。

呢個人全身上下著住黑色裝甲，臉上戴住一個類似《星球大戰》黑武士嘅頭盔。

唔同嘅係，呢個人揸住嘅唔係激光劍，而係會射激光嘅黑色機槍。



個黑色裝甲友再開第三槍。呢槍正中我身邊嘅喪屍，個頭一下就爆開左。

隨即佢就將槍頭指向我。

我馬上舉高雙手：「唔好開槍...我係人嚟架…唔係喪屍…所以唔好開槍…」

對方定左無郁，好似喺度打量緊我。

以佢呢身裝束，俾我感覺就似係一啲特種部隊，唔知係咪進行緊救援行動。

於是我就問：「請問你…你係咪嚟救大學入面嘅生還者？」

對方無答我，神驚無神，又舉槍射上自己頭頂嘅天花板。



「BOOM！！！」

超大聲一下爆炸，嚇到我即刻雞咁跳咁逃走。

照咁睇條裝甲友似係嚟殺人多過救人。

跑遠之後，我先敢擰返轉頭望。

原來嗰條友係有同伴，一樣係全身笠住黑色甲，以及頭戴密封嘅黑色面罩。

略略估計，同行起碼有十條友。

佢地一齊行入去，剛才我同鬼佬身處嘅嗰間實驗室。

我擰返轉面，無再理會咁多，又摸一摸頭頂，發現頭上嗰隻簷蛇已經消失左。



跟住鬆一口氣，繼續向前跑，按原路經實驗室嘅入口返出外面。