性交轉運打喪屍: （89）

「BOOM！！！」

佢地兩個俾炸彈炸飛，裝甲人咁啱飛到嚟商場門口。

佢好似暈左，無乜反應，黑色面罩上有裂痕，身上嘅裝甲亦破爛到一岩一忽。

仲以為咁嘅爆炸可以炸得死隻喪屍，只係當濃煙散去，居然仲見到隻嘢企得返起身。

除左皮膚有啲燒傷之外，佢依然跑得行得。



我出盡力拖裝甲人入嚟商場，因為佢攝喺樓梯口中間，要拖佢入嚟先可以落到鐵閘。

（其實亦可以踢走佢再落閘，問題係佢大半個身入左嚟商場，踢佢出去會比較曬時間，所以先選擇拖佢入嚟。）

喪屍全力衝刺過嚟，就喺佢嚟到商場門口一刻，啱啱好將個鐵閘拉到落底，並立即鎖上。

憑佢啲牙再利，指甲再尖，都無本事衝破鐵閘。

我拍拍心口定定驚，裝甲人經短暫昏迷後，亦都醒返。



佢第一眼見到我，就掹槍對住我。

「喂唔好呀！頭先係我救你入嚟架！你唔好咁忘恩負義！」我舉高手唔敢郁。

佢無出聲，槍口對左我幾秒後，就將槍頭擰轉，向住商場樓梯行去。

我跟住佢尾行上一層。

留意到，對方掹雞嗰隻手，保護手腕嘅裝甲爆開左，入面隻手好明顯流緊血。



呢間商場叫東方188，大部分嘅店鋪都係專門買電腦用品、電話同遊戲之類嘅嘢。

眼前所見，鋪頭唔見有人，但就有喪屍。

裝甲人保持警惕，一見到喪屍就開槍射。

隻手受傷都照樣下下爆頭，真係厲害。

慶幸呢啲係普通喪屍，而非出面隻綠眼喪屍，相對比較容易對付。

我跟住佢尾，圍住商場狹窄嘅走廊打個圈。

確認過呢度安全無曬喪屍後，經過一間賣手機殼嘅鋪頭，遇到門外兩張櫈，裝甲人埋去坐低。

我諗住坐去佢隔籬張櫈，點知對方卻再次用槍頭指住我，示意我唔好靠近佢。



既然係咁，我唯有搬開張櫈，隔兩個鋪位再坐低。

對方唔講嘢，我亦無出聲，彼此陷入沉默嘅氣氛。

過左一陣，對方繼續唔講嘢，我就忍唔住問：「其實你係咩人…」

一開聲，對方又舉槍指住我，令我不得不合埋把口。

又過左一陣，裝甲人突然講嘢，但唔係同我講。

「Alpha，請你知會你地目前嘅位置俾我，over？」

佢一路擰面罩側邊一粒掣，一路講嘢，說話內容似係聯絡緊自己嘅同伴。



隔住面罩嘅呢把聲，真係十足十嗰啲經電腦處理過嘅機械聲。

「Alpha？你聽唔聽到？over？」

......

自己嘅說話得唔到回應，自言自語左一陣，就靜左唔出聲。

然後，佢除低面罩。

終於可以見到佢嘅廬山真面目。

就喺佢除罩後嘅一瞬間，我呆左…

估唔到…眼前呢個咁好打嘅裝甲人…真身居然…



居然係女人？

而且…佢個樣仲幾靚…

輪廓分明，眉目如畫，皮膚白到好似從來無曬過太陽咁。

此刻嘅佢臉頰通紅，額頭滲著汗珠，因此就有種白裡透紅嘅感覺。

至於年紀睇落細我兩三年，估計最多係十七十八歲。

我眼甘甘望住佢個樣，心裡震驚不已，無法相信厚厚嘅裝甲之下，竟然係個𡃁妹…