性交轉運打喪屍: （93）

套戲睇完，個女仔又逛去第二度。

佢逐間鋪頭行入去，見都咩都拎上手望下。

「原來呢度都有模擬器架。」

佢行入一間game鋪，拎起一支遊戲槍，對住個mon喺度玩。

雖然我平時比較少打機，但都認得出部嘢係Switch。



對方依家玩緊嘅應該係啲射喪屍嘅遊戲。

平時揸開激光槍，打機揸遊戲槍當然就難唔到佢，下下都射中頭，幾下手勢就順利過關。

「輪到你。」佢將遊戲槍遞俾我。

「我…我…」

我想講自己唔係咁識玩，但就俾佢打斷：「嚟啦，just shoot！」



我瞄嚟瞄去瞄唔準，射極都射唔知中，好快就game over左。

「奇怪啦，剛才見你，一邊跑，一邊擰轉身開槍，都射低左幾隻喪屍，依家模擬又會咁快死左嘅？」

「Er…嗰陣符碌啫。」

「符碌係咩？」

「即係運氣好咁解。」



「哦…」

連符碌都聽唔明，條友唔通唔係香港人？會唔會係其他地方嘅僱傭兵之類嗰啲？

假如係嘅話，咁佢地嚟香港有咩目的？

我好想問個究竟，只係對方好認真咁玩緊部switch，因此就費事騷擾。

過左一陣，我又返落去樓下，𥄫下隻死纏爛打嘅綠眼喪屍走左未。

家陣大約係下晝三點，出面烈日當空，又熱又曬。

嗰隻喪屍仍然未肯走，繼續留守喺出面，虎視眈眈。

一般喪屍求其引下就走，呢隻喪屍引走完又會返轉頭，死都要盯住獵物唔放。



隻嘢咁棘手，真係有啲唔知點算好。

我歎一口氣，又返上樓上。

個女仔無喺game鋪，去左間修理電話嘅鋪頭，揾左把螺絲批，搞緊佢嗰舊火柴盒大細嘅通訊器。

佢一路整，一路測試：「我係Kappa。Alpha請問你收唔收到？over。」

原來呢個女仔叫Kappa，咁個名都幾少人用。

「外面嗰隻『綠眼』走左未？」佢問我。

「未。」



佢唔知喺邊度揾左支綠茶，飲一啖講：「咁無辦法，佢唔走，只能硬碰硬。」

「你趕住出去揾返你嗰啲同伴？其實你地係咩人？」

佢望我一眼，無回答，跟手將舊通訊器放入褲袋。

既然氹唔到佢開口，唯有轉移話題：「話時話，你呢支茶邊度揾架？」

佢又飲一啖，指一指走廊後面。

嗯？乜呢度有賣飲品嘅鋪頭咩？頭先唔覺眼嘅？

「你想飲？我呢度仲有三支，俾支你。」佢遞一樽無開過嘅綠茶俾我。

我拎上手，直接擰開一飲，入口嗰下覺得好唔對路。



點解個口感咁奇怪嘅…滑潺潺…傑撻撻咁好鬼死黏口…

我再仔細睇清睇楚樽身上面啲字。

下！乜嘢龜頭園，乜嘢弱酸性？呢支究竟乜q嘢嚟？

喉嚨滑潺潺，好鬼難受，我問Kappa：「你呢支嘢喺後面邊間鋪頭攞架？」

「粉紅色門口嗰度。」佢又飲一啖「綠茶」。

我立即行過去睇下佢講嗰個位置。

唔睇由至可，一睇嚇一跳。



呢間嘢賣情趣用品架喎，好好地一個電腦場，因乜事無端端有間咁嘅嘢？

而作為一間成人用品店，好地地又點解會有綠茶？

唔係唔係，支嘢並唔係綠茶！

弊...呢個口感又滑又潺，唔會係潤滑油掛？

「嘔—」我當堂反胃，猛咁伸手指入去扣喉。

Kappa就走埋嚟問：「你嘔？無嘢嘛？」

我想解釋呢支嘢唔係綠茶，但又講唔出潤滑油三個字，因為真係好嘔心，連自己都唔敢相信。

「我過多陣就出去，你要唔要一齊？定還是，有同伴會嚟救你？」佢問。

我搖搖頭，用手抹一抹嘴角：「我嘅同伴頭先嚟過救我，但我叫佢地走先，我遲啲再去鰂魚涌會合佢地。」

「鰂魚涌？」

「係，我地手上有對付喪屍病毒嘅解藥，計劃去鰂魚涌一間倉庫實驗室度研製。」

「對付喪屍嘅解藥？你意思係，antidote？」

「無錯，係『anti刀』。」