性交轉運打喪屍: （107）

「轟隆！」

行雷閃電，雨水一滴一滴沾濕身體。

我地喺沿連接天橋嘅樓梯頂，「sir」落去再直接跳落地下。

橋嘅旁邊有個電車站，眼見附近都無喪屍，於是索性喺度避雨。

對開嘅馬路一片狼藉，殘肢遍地，亦有數架汽車傾側。



從天而降嘅雨水，將地上風乾嘅血跡沖走，匯成一條條紅色嘅小河流。

當雨水落在車身上，又會發出「噠噠噠」嘅聲音。

我地兩個就企喺車站，等待雨停。

Kappa用手抹走額頭上嘅水珠，隨口問我：「係啦，頭先你訓覺嗰陣，做咩突然嗌我個名嘅？」

「下…乜我…我訓覺嗰陣…嗌左你個名？」



「係呀，你訓訓下，無端端『嘻嘻』喺度笑，又嗌我個名。」

「係咩…又會咁都有嘅…呵呵…」我尷尬一笑，塊臉瞬間變得又紅又熱。

無估錯嘅話，實係我發夢夢見Kappa嗰陣，唔小心嗌埋人地個名出嚟。

呢刻我唔敢直視對方，只係偷偷地眼尾睄過去，並幻想眼前著住黑色裝甲嘅Kappa，換上純白色嘅長裙，將頭髮放埋落嚟，再化上淡妝，猶如喺夢入面所見到嘅佢一樣。

腦海一邊幻想，心跳就一路怦怦怦加速。



「咚！！！」

然而，地下突然一下劇烈嘅震動，震碎頭上嘅幻想氣泡。

紅眼喪屍喺無任何預兆嘅情況下，從對面座大廈嘅二樓，破窗跳落嚟地下，仲喺正我地面前。

我同Kappa打左個突，嚇到呆左。

下一秒，紅眼喪屍踏前舉起拳頭，如一個大鐵鎚般，垂直咁揼落嚟。

「砰！」堅硬嘅石屎地一下就俾佢打碎，凹左個大窿。

喺佢出手一刻，我同Kappa一個向左，一個向右，各自跳起閃避。

慶幸反應及時，否則我地肯定會俾打成肉醬。



一擊唔中，喪屍當然唔會就此罷休，隨即檻過去右邊，追擊Kappa。

同樣都係變異喪屍，比起綠眼，紅眼喪屍速度唔算特別快。

只不過，佢又高又大份，行一步就等於人地踏三四步。

隻嘢兩步追到Kappa面前，且揮拳相向。

Kappa即刻踎低避開，隻嘢「砰」一聲打爆車站頂。

「滴噠...滴噠...」

個天仍然落緊雨，行緊雷。



喪屍踩住濕漉漉嘅地面，向住Kappa又擊出一拳，結果又被對手避開。

而今次隻嘢好似知道對方會避開，所以猝不及防，突然踢腳攻擊。

呢一腳Kappa食到應一應，成個人向後飛到幾呎遠，不由自控咁撞落去，路上一架翻側嘅私家車度。

與此同時，身上小腹處嘅裝甲已整個裂開，露出裡面嘅打底衫。

至於我並非翹埋手食花生，喺關注Kappa嘅同時，一直喺附近揾有無架撐幫得手。

卒之，就俾我喺路邊執到一支手槍。

「砰！砰！砰！」我第一時間衝埋去，向住隻嘢連開幾槍。

三槍嘅子彈都射中身，對方卻不痛不癢。



槍聲吸引左佢嘅注意力，佢擰個頭埋嚟對住我。