性交轉運打喪屍: （118）

全屋三個男人，一個煮緊飯，一個飲緊酒，得我無嘢做，所以S，andy同Shirley點左我出去走廊，行去後門處，打開個消防水喉掣。

踏出門口就隱約有啲喪屍叫聲傳嚟，我一個人，兩手fing fing，慢慢行去走廊後面。

慶幸嘅係一路上都係得啲聲，而見唔到喪屍。

我按Sandy佢地吩咐，開住水喉開左七、八分鐘，等到單位嗰邊儲夠水，我再閂返佢，行返轉頭返去單位。

我以為得Kappa一個人沖，點知Sandy同Shirley都入埋去，佢地三條友一齊沖。



佢地啲污糟衫就咁放喺門口，經過嘅時候，我睄到Kappa嗰條工裝褲嘅褲袋，突左一張地圖嘅一角，同埋有隻類似係智能手錶嘅物體，有一角露左出嚟。

本來我只係睄一眼，跟住就掂行掂過，點知嗰隻錶無啦啦開著左，震左一下。

好奇心促使下，我摷出嚟「裝」下。

張地圖我之前見過佢有拎過出嚟，係一張香港地圖，上面零零捨捨標記左九龍塘同城大嘅位置。

至於隻錶望落就真係似，坊間嗰啲智能手錶，只不過就無錶帶得錶面。



而喺大約一吋多啲嘅熒幕上，正顯示一個提示信息：「5 days left.」

五日？即係點？

我手多多再㩒幾下，睇下有無其他提示信息，殊不知㩒㩒下突然出左一條片。

條片係第一身拍攝，影住一隻手，揸住一支試管，面前係一張長檯，上面訓左一個細路。

呢個細路我認得，佢係實驗室嗰個鬼佬教授個仔。



「Raauugghh…」

個細路綁住手腳，口角沾血，眼睛反白，嘴巴發出可怕嘅叫聲，兼且全身皮膚呈灰白色，恰似一隻喪屍。

隨即，片入面嗰隻手將試管裡面嘅液體，倒入去鬼仔嘅口入面。

三秒之後，個鬼仔雙眼由白色變成藍色，灰白色嘅皮膚漸漸變返普通白人嘅膚色，與此同時亦無再咆哮，仲恢復意識，認得佢老豆，嗌左句：「Dad？」

條片嚟到呢下就完左，全長得三十秒，完左之後又自動播另一條片。

第二條片影住個鬼佬展示手上樽透明液體，一輪嘴講一啲我聽唔明嘅英文…唔係唔係，其中有一個字我聽得明。

「anti刀」，呢個我明咩意思。

個鬼佬講到中途忽然傳出敲打門嘅聲音，之後咁條片就突然完左，片長亦不過三十秒。



隻錶就得兩條片，播完就回到「5 day left」嘅畫面。

我睇完曬，徹徹底底一頭霧水，心諗點解Kappa會有呢啲片？

莫非係個鬼佬send俾佢？但點解每條片都係咁零碎？

假設啲片真係個鬼佬俾佢，咁嗰日佢出現喺實驗室，唔通係嚟揾個鬼佬？

究竟Kappa係一個咩人？