性交轉運打喪屍: （126）

儘管逃走左出嚟，但危機卻仍未解除。

嗰班裝甲人亦追左出嚟，唔肯咁輕易放過我。

班人拎住一擊致命嘅激光槍，比喪屍更加危險。

驚恐又慌張嘅我於走廊中，拼命狂奔。

佢地雖然一身重裝甲，不過速度好快，身手亦十分敏捷，。



其中追得最貼身嗰一個，舉起槍準備要瞄準，可惜，不幸地，佢唔小心「kick」到地下條消防喉管，成個人仆左落地。

之前我拉完條喉管，放完水之後，我就無收返埋，就咁放喺走廊度，結果間接令到條友仆街。

然而一條友冧左，但後面仲有好幾條友窮追不捨。

當我啱轉入後樓梯之際，耳邊聽到「蕉」一聲。

下一秒，後樓梯道門大爆炸，成道門炸爛左。



爆炸所產生嘅強大衝擊力，將我彈飛到成米遠，仆埋落地下。

踭頭落地，撞瘀左少少，已經算係不幸中大幸，啱啱只要行慢一步，炸開嘅就會係我個身體。

生與死之間，僅僅相差一步，因此，我其實係好勉強先僥倖躲過一劫。

近距離嘅爆炸除左有衝擊力，仲有震撼嘅爆炸聲，我耳仔家下「嗡嗡聲」，並夾雜住急促嘅腳步聲。

聽到呢啲聲，唔洗睇都知，後面啲人就嚟追到。



起返身，我跑上樓梯，殊不知上左一層樓梯，卻又遇到四隻喪屍。

無辦法調頭走，逼於無奈，手無寸鐵嘅我只好頂硬上，赤手空拳對付喪屍。

「Raaauuugggh——」

結果兩隻喪屍率先出手，我避到一隻，卻避唔開第二隻。

嗰隻兇狠嘅喪屍捉住我手臂，張開沾滿鮮血嘅嘴巴。

我用力反抗，眼尾睄到嗰幾個裝甲人已經殺到。

「蕉！」好快就聽到激光發射嘅聲音。

與此同時，一直擺脫緊喪屍嘅我，唔小心喺樓梯上差錯腳，成個人企唔穩，個身擺左一擺。



「Boom！」

下一秒，面前喪屍個頭爆開左，啲血、腦漿汁飛濺到我臉上。

開槍嘅裝甲人搖搖頭，揼左一下地，從佢呢下嘅動作，我相信啱先嗰槍本來係要射我，只係咁啱我差錯腳，個身同個頭移左半吋，所以對方先打唔中。

兩隻喪屍轉移目標，撲向嗰班裝甲人，剩低嗰隻喺我旁邊。

我出盡全力，扯住佢隻手，用力咁將佢掹落樓梯，總之俾曬啲喪屍班裝甲人對付，然後自己繼續逃跑。

再上多一層樓梯，我終於撞見返Sandy同Shirley。

佢地嘗試逐間逐間，打開走廊上各個單位嘅大門。



我無講太多，直接行去幫手，試下道門打得開。

「呢間！呢間開到呀！」Shirley成功拉開左一道鐵製嘅趟門。

嗰啲急促嘅腳步聲再次貼近，睇嚟幾隻喪屍不足以阻擋班裝甲人。

我同Sandy慌慌張張，用最快嘅速度跑過去，跟住Shirley尾匿入去門後。

為左唔好驚動嗰班友，Shirley輕輕咁趟返實道門。

「喂！你件衫攝住左！」Sandy細細聲對我講。

我轉身一睇，發現衫尾真係攝住喺門嚹入面，於是立即掹返出嚟，耳仔聽到門外有腳步聲。

我地幾個唔敢郁，連抖啖都唔敢太大聲。



雖然見唔到佢地嘅動作，從一時近一時遠嘅腳步聲，大概判斷到佢地喺走廊徘徊，一路揾緊我地。

四周圍非常安靜，除左腳步聲，咩聲都聽唔到。

大約過左五分鐘，嗰班人嘅腳步終於慢慢咁遠離。

呢五分鐘可以話相當漫長、相當煎熬。

我地匿埋嘅地方無喪屍，尚算安全，因此選擇喺呢度暫避。

呢度係一個裝修緊嘅單位，佈置似係一間西餐廳。

Sandy同Shirley暫時鬆一口氣，而我就擔心緊Kappa。



佢為左我而違抗Alpha命令，我好驚Alpha嬲得滯，隨時會殺死佢。

另外，喺擔心Kappa嘅同時，我亦都擔心緊自己。

剛才真係非常非常驚險，有幾下差少少就無命，再加上衫尾竟然會俾門嚹夾中，以上種種現象，係咪代表我嘅運氣正在消減？