性交轉運打喪屍: （136）

鮮血不斷從膊頭上嘅傷口滲出，受傷嘅人卻無法動彈，只能咬實牙關，忍住痛楚。

「真係諗唔明，頭先你明明廢到爆炸，點解會無端端變到咁鬼勁？你係咪啪左咩藥？」Alpha問。

「係血，佢沾染左紅眼同綠眼喪屍嘅血。」阿得行上前，靠近我身邊，望住我手臂嘅傷口回答。

「既然惹左啲血，點解又無變喪屍？」Alpha問。

「或者係因為嗰啲血，經過左我嘅化學稀釋。」



「哦，原來係咁。」

聽完阿得咁講，我喺度諗，依家嘅自己，算唔算變左半人半喪屍？

「一日最衰都係你！嗰兩隻變種喪屍嘅解藥，我本來整得好地地，點知俾你砸爛曬我啲嘢，全部俾你搞『wor』曬！」阿得雙手扯住我衣領，怒目相向。

怪責完我，佢又低聲下氣請求Alpha，「你可唔可俾多啲時間我，我需要重新set up，重新整多一次。」

Alpha無回答，只係叫左嗰個唯一無俾我打低嘅手下，拎部電腦同usb手指過去。



電腦同usb本身放喺長檯上，頭先我砸爛張檯，搞到兩樣嘢都跌左落地下。

阿得則跪喺對方面前，繼續哀求：「俾多少少時間我，我一定研製到出嚟架！我淨係想用一次時光機！求下你！」

我明白阿得嘅意圖，佢好明顯係想用時光機，回到過去救佢老婆。

「俾多啲時間即係幾耐？一日？兩日？定三日？」Alpha問阿得。

「一日！再俾多二十四個鐘我！我一定搞得掂！」



「算啦！我知研發解藥都唔係一日半日嘅事，所以諗諗下，我決定都係唔浪費時間喺你身上，而我亦都無咁多時間浪費。」Alpha一腳撐開阿得。

然之後，條友珍而重之從手下手上拎過隻USB：「好彩，好彩無爛到。」

阿得死心不息：「唔係架！你再俾多少少時間我，我一定整到架啦！」

「頂！好煩呀你！」Alpha忍唔住一掌摑埋去，直接摑暈左阿得。

跟住條友叫手下丟部notebook落地下，再用力踩爛部機。

「好啦，隻usb我就正式收下，接下來就要收埋你條命。」Alpha口中嘅「你」即係話我。

就喺呢個時候，沉默已久嘅楊過竟然成功解開綁喺手上條繩。

佢猶如猛虎出閘，猛然從後撞跌Alpha。



「你條仆街！我要幫Jojo報仇！」楊過仍然對Jojo嘅死耿耿於懷。

由於Alpha同另一個裝甲人嘅注意力，一直都放喺我身上，完全忽略左楊過，因此就俾楊過偷襲成功。

楊過同Alpha二人喺地下纏鬥，Alpha身上無左裝甲保護，一下子就被楊過壓制。

佢地唔敢傷害楊過，所以要就住就住，唔開用刀更唔敢開槍。

至於我就乘機救走Kappa，兼幫佢鬆綁。

混戰過程中，嗰隻usb從Alpha手上脫落，仲跌正喺我面前。