性交轉運打喪屍: （140）

「拿，我有個提議，反正我有幾個夥記都死左，所以部時光機多左幾個位，不如你地全部人包括暈左嘅嗰條友，一齊跟我穿越去未來。」Alpha態度一百八十度度轉變，不但唔再要殺死我地，居然仲提出帶我地走。

「咁樣嘅話，一嚟你同Kappa唔洗分開。」

Alpha望住我同Kappa講完，然後視線轉移到樓上，對Sandy同Shirley講，「二嚟你地兩個咪話想要棟樓嘅，如果你地跟我去未來同一齊重新建構香港，咁到時全香港嘅屋都由我地分配，你地想要幾多棟都無問題。」

佢吞啖口水繼續講：「我相信大家都聽過一個比喻，呢個年代嘅香港係一個玩左三個鐘嘅大富翁，大部分嘅土地同資源都掌握喺一小部分人手上，但我可以話你聽，喺未來所有嘢都推倒重來，全部嘢都reset過，咁試問你地會選擇留喺度，繼續玩呢個唔公平嘅遊戲，定還是去未來玩一鋪全新嘅大富翁？」

「阿妹，你點睇呀？」Sandy問Shirley。



「我…我覺得佢講得都幾啱聽嘅。」

兩姊妹似乎對Alpha呢番說話幾受落。

「部時光機每隔十四日先可以啟動一次，計返日子，仲有兩日就會重新再啟動，所以你地想嘅話，兩日之後我就帶你地一齊走！」

「夠啦！你同我收聲！」

楊過一路㩒住喺Alpha喺地下，一路都無講嘢，突然間大叫Alpha收聲。



佢揾左剛才綁喺自己手上嘅麻繩，用嚟反綁返Alpha，然後行過嚟我身邊，搶走隻usb：「未來係點我唔理，我淨係知出面依家仲有好多生還者，喺呢個末日之下掙扎求存，當中有俾喪屍追殺嘅人，有為左少少糧食而互相殘殺嘅人，我地唔可以咁自私唔理呢班人，所以呢隻『手指』我地一定要交俾乘哥！」

「但Kappa會…」

「唔怕，最多我地咪同乘哥講聲，直接叫佢揾人照樣喺實驗室，照樣整試管嬰兒咪得。」楊過回應我。

「哈！諗清楚呀，蝴蝶效應大家都聽過，只要少少嘅改變，歷史都會好唔一樣，就算同樣係試管嬰兒，但都有可能係唔同嘅染色體結合。」Alpha冷笑一聲駁斥。

一隻蝴蝶喺巴西輕拍翅膀，可以令一個月後德州出現龍捲風，呢個就係所謂嘅蝴蝶效應。