性交轉運打喪屍: （150）

「啊！」我突然之間成個扎醒左。

「嚇鬼死咩！無啦啦喺度大叫！」

「San…Sandy？仲有Shirley？」

「搞咩呀你？發噩夢呀？」Sandy批緊一個蘋果。

「呢度…呢度係邊度？」我環顧周圍，發現自己身處一個室內體育館，周圍有好多人。



「訓醒教咩都唔記得啦？呢度咪臨時搭建嘅庇護中心。」Sandy遞左批好左嘅蘋果俾Shirley。

「好消息呀好消息呀！」

呢個時候，楊過同Isabel一臉興奮咁行埋嚟，「大家聽下，收音機話港島已經有十萬人由喪屍變返正常人，仲話已經增派人手到九龍發放解藥！」

「解藥？」我仍然心神恍惚。

「哈，咁就好啦，睇嚟我地好快可以平安返屋企啦！」Shirley好開心咁咬一啖蘋果。



楊過見我額頭冒汗，就問我：「你個樣睇落有啲唔妥喎，頭先發噩夢？定係唔舒服發燒？」

「我…我記唔起…」呢一刻我腦海空白一片，諗唔起啱先自己係咪有發過夢。

至於楊過手上拎住嘅收音機正喺度匯報緊最新消息。

報道員話李瓜乘嘅團隊研發到解藥治療喪屍病毒，並已經開始大量生產，除此之外，佢亦召集一大班志願人士組織成民兵團隊，構建臨時庇護中心保護市民。

聽完呢段報道，我諗起自己同Shirley由城大出到嚟，遇到兩架直升機，佢地將我地送到嚟庇護中心呢度。



係啦，我喺城大救左Shirley，Sandy話過邊個救到佢個妹，就會同嗰個人上床。

「乜我有咁講過咩？」Sandy反問我。

「你嗰陣明明係咁講，應承左邊個救到你妹，你就會以身相許。」

「咩呀，你記錯左啦。」

「下？我記錯左？」唔知係咪個人未訓醒咁，個腦唔太清醒，記憶有啲混亂，一味形住自己剛才似乎係發左一個好長嘅夢，但又完全諗唔起夢境所發生嘅事。

三日後，全香港嘅喪屍統統清除曬，乘哥更帶頭組建左臨時政府，組織更多嘅人護送我地呢班生還者，平安返到自己嘅屋企。

老豆同娟姐喺呢次喪屍危機中喪生，如今老舊嘅唐樓單位就得返我一個住客。

以後都唔會再有喪屍，以後都唔洗擔驚受怕之餘，仲可以一個人霸曬全間屋，奇怪嘅係，呢刻獨自望見四面墻，唔知點解卻有種落寞嘅感覺。



我行入廁所沖涼，除衫嗰陣，喺條褲入面跌出一隻usb「手指」。

沖完涼，我用電腦打開嚟睇睇，裡面有個file，列明一啲睇唔明嘅化學符號。

諗返起城大個鬼佬臨死前交呢隻「手指」俾我，仲以為有啲咩咁特別，原來只係一堆正常人無法解讀既化學程式。

我半點都睇唔明，掹返隻usb出嚟，當垃圾咁求其丟埋一邊。

既然生活已經恢復返正常，咁就要過返啲正常人嘅日子，亦即係要揾嘢做賺錢嚟維持生計。

由於光頭老細死左，所以我無辦法繼續喺道堂打工，於是左揾右揾先俾我喺便利店，揾到份收銀嘅工作。

好似我呢啲無學歷又無彩數嘅人，大概呢世人就只能做呢啲咁嘅工作。