我係一個社會運動家。

每一日做嘅唔係研究倫理學同政治哲學,佢哋太old school啦。為咗令世界變得更加美好,作為一個正義嘅人,我每日孜孜不倦咁做嘅係── 睇股票。

點解個世界咁唔公平?我買Apple個陣TSLA升,買TSLA時TALA跌。高價買Bitcoin低價賣Bitcoin。自由,平等,博愛唔係人類嘅目標咩?平等,平等,平等,個世界公平咩,公平咩?公平嘅話點解股市仲會係到?唔講啦,睇吓買邊隻股好先。

我係一個社會運動家,真正嘅社會運動家,如假包換,貨真價實,唔係咩職業賭徒,股票只係我研究《人類不平等的起源》的現代版。作為一個大學生,一個現代社會精英,一個一級榮譽畢業生。。。個師弟,咁唔公平竟然出現係我身上,有無人聽過,咁唔合理嘅事,我點可以比佢發生?

六年啦,三年又三年,三年又三年,我已經為改善社會風氣,提升公民質素而提倡更新法律已經有六年咁長啦。人生有幾多個六年?我都係人,我都有感情。





只係我仲未可以放棄。放棄咗,我仲會唔會係我屋企人嘅榜樣,女朋友嘅偶像?放棄咗,我將會由社會的革新者,法律嘅挑戰者變咗做個失敗者,我喺社會上如何自處?

放棄真係好困難。

棄真係好困難。

真係好困難。

係好困難。





好困難。

困難。

難。

難在於我作為一個堅定嘅人,咩嘢都可以無,做失敗者都唔緊要,就係唔可以無左女朋友。一旦失去咗佢嘅目光,就離失去佢不遠了。
自從有咗女朋友之後,朋友們成了一個個死在通訊錄內的數字。究竟佢有什麼魔力?佢係所有男人夢寐以求的存在,用文字描述簡直係太過膚淺。一句講晒,如果可以嘅話,我會同佢結婚。

作為一個理智人,等我用冷冰冰的數字泥分析下我有幾鍾意佢。一米六八,四十二吋,三六廿四,同埋三六。





數據果然係死嘅,文字先至有溫度可言。女朋友,其形也,翩若驚鴻,婉若游龍。榮曜秋菊,華茂春松。仿佛兮若輕雲之蔽月,飄飄兮若流風之回雪。遠而望之,皎若太陽升朝霞;迫而察之,灼若芙蕖出淥波。濃纖得衷,修短合度。肩若削成,腰如約素。延頸秀項,皓質呈露。芳澤無加,鉛華弗御。雲髻峨峨,修眉聯娟。丹唇外朗,皓齒內鮮。明眸善睞,靨輔承權。瑰姿艷逸,儀靜體閒。柔情綽態,媚於語言。奇服曠世,骨像應圖。

我係一個成熟嘅人,更加着重於佢嘅內在,因為佢嘅外在已經滿咗分。佢係一個溫柔嘅人,每當我有任何開心唔開心嘅事,都會耐心咁聽我講;每當我有咩嘢想玩,都會喺一邊靜靜咁陪住我。佢唔單止願意陪我食老麥,甚至唔食野都陪住我。只係作為一個有責任感嘅男人,事業未處理好又點可以去結婚呢?

革命尚未成功,同志我需努力。共勉之。

我係一個社會運動家,所推動嘅係《玩偶婚姻合法化》。
已有 0 人追稿