我次次拍拖都拍唔長，因為我……: 阿希篇

話說我帶咗阿叔入家姐間房後，我見到佢個樣好唔妥，好似嚇到面青口唇白，唔通佢真係見到間房有嘢？我問佢「你係咪睇到啲咩？」

阿叔細細聲講咗句「er......我想......食煙....附近有冇士多，我想買包煙食」睇嚟佢想搵籍口離開我間屋，我話「有啊，村口有士多，我帶你去啊」

我帶咗佢離開屋企，我一路行一路問「做咩啊？係咪有啲咩問題？」阿叔全程一言不發，之後係褲袋攞咗包煙出嚟，點咗支煙吸咗兩口，我話「不如去附近籃球場坐下好冇？」佢點咗下頭

我哋坐咗係籃球場啲長凳到，大叔由沉默變番正常，開口講嘢，佢問「你家姐啲衫係邊到買？」

「唔知啊，應該都係網購買，佢成日都買啲日系二手衫」





大叔嘆咗口氣咗講「唔怪得之啦，你家姐間房好撚猛啊，應該係啲二手衫出事」我唔係好明佢講咩，問佢「你意思係啲鬼跟住啲二手衫入咗我屋企？」

佢話「啲二手衫呢，好多都唔係從正當途徑收集番嚟，好多係故衣嚟，姐係死人衫.....果啲朋友仔係附咗係啲衫到，所以我勸你哋以後都唔好買二手衫」

聽完大叔嘅解釋，我心入面不禁有種不寒而慄嘅感覺，連大叔呢啲見鬼見到慣嘅人都咁大反應，睇嚟當時個畫面真係好衝擊。

我繼續追問「頭先你見到幾多隻朋友仔？佢哋係點嘅樣？」

「望咗眼見到有大約六至七個......佢哋附咗係啲衫到，一個個好似被衣架掛住咗係晾衫架上面，佢哋本身應該feel到有客人入屋，所以匿埋係你家姐架房到，唔想畀人見到，當你一打開門果陣佢哋都不約而同咁望住我哋，個種眼神好似覺得我哋好滋擾咁」





我話「唔撚係掛六七隻咁撚多，仲要成堆掛爐鴨咁掛係間房到......」

大叔冷笑咗下「都有啲似掛爐燒鴨嘅......唉，時候都唔早啦，我番屋企先.....遲下再聯絡」

我當時心諗，仆街咁冇義氣，咁快走你講到咁撚得人驚，我仲點敢番屋企啊！

正當佢想起身走人果下，我即刻反射動作，轉身攬住佢條腰，唔畀佢走....雖然果下動作好基，但我冇辦法，冇人陪我我根本唔敢番屋企，我死死地氣話「救命啊大佬，唔好走，幫幫手諗下點送走啲朋友啊，唔該」