見到大叔就知佢唔係幾鐘意我嚟長住,其實一星期都好快過姐,我攞住個大行李喼跟住阿叔上樓梯,條樓梯都好窄下,上到三樓就去到大叔屋企,我人生中都好少去唐樓,一入到去佢屋企就有陣垃圾臭味我話「嘩,好大陣味,你幾耐冇dum 垃圾?」

佢話「冇計啦,唐樓唔同私樓,又唔似你哋村屋咁村口有垃圾站,我哋dum 垃圾要趁半夜冇人落樓下,dum 落啲街嘅垃圾桶到,唔好彩畀食環捉到又要罰錢」

我擺低行李周圍望下間屋,發現大叔根本就冇執屋,污糟邋遢,牆都痴晒蜘蛛網勁嘔心,最恐怖係個馬桶啊,仲污糟過公廁佈滿屎跡......

大叔話「我收留你有條件㗎,你要幫我執屋清潔」心諗屌你咁污糟好心就請鐘點啦,但我又的確係寄人籬下,只好死死地氣執屋

大叔間屋好細下係,我諗應該係一個唐樓單位分兩間果啲嚟,一房一廳開放式廚房,雖然係唐樓但又唔算好殘舊,內部都有裝修過,我首先包好廚房啲垃圾,打算偷偷地落樓下扔