我次次拍拖都拍唔長，因為我……: 阿希篇

個感覺好神奇，好似寵物小精靈訓練員咁，帶小精靈出街，不過我係帶住隻鬼出門，我問「阿儀，你哋有冇超能力，預知能力果啲？」

阿儀笑笑口話「你會唔會諗多咗，我哋冇咩特別能力，只係可以穿牆穿門，隔空取物嘅能力都唔係次次work,所以唔好知哂鬼片果啲情節」

我話「你見番個兇手打算點做？」

佢話「講真，我都未必敢同佢正面交鋒，佢有玩茅山捉鬼果啲，我都未必埋到佢身，但我想睇下佢宜家生活過成點，同埋想搵多啲證據幫自己翻案」

我話「好啊，睇佢個仆街會唔會晚年過得好折墮，計番呢廿幾年，佢宜家都應該變咗個死廢老，都六七十歲」





隔離啲路人用住奇怪目光望住我，可能以為我係到自言自語，我feel到畀人望，攞出個耳機戴住扮同人傾緊電話，想逃避啲人嘅奇怪目光

阿儀一直跟住係我後面，我同佢去咗地鐵站過旺角，阿儀話「條街真係同以前唔同晒，地鐵站同車廂都變晒」佢周圍望，好似大鄉里出城咁

我話「跟據你個地址，係地鐵站A出口行兩分鐘就到」阿儀話「好緊張，都隔咗咁耐，可能佢都死咗，但如果佢未死，我一定唔會畀佢有好日子過」

我話「下個站到啦，跟貼啲，旺角好多人，怕你會走失」阿儀伸手搭住我隻手話「咁我搭住你行吧」呢個感覺好微妙，我feel到畀佢搭住，但又感受唔到佢嘅體溫，反而有一絲絲嘅涼意，有啲起雞皮嘅感覺

我幾經辛苦係人群中迫咗出去車卡，因為我都未去過目的地，所以我係月台開咗個定位跟住行，阿儀問「呢個咩嚟遊戲嚟？」我話「GPS啊，因為呢頭我都唔熟路，開咗呢個跟地圖行就得了」





跟住gps 我地都好快去到，眼前見到一棟唐樓，我問阿儀「係咪呢到？」佢點頭話係，我推開重重嘅鐵閘，慢慢咁行上去，沿路樓梯都有煙味，我問「幾樓啊？」佢話「到啦，二樓，但係.....佢間鋪變咗」

我望一望，眼前見到一間女僕咖啡店，睇嚟間鋪都轉咗手，見到阿儀個樣好失望，我打算講嘢安慰吓佢，正當我想開口果下，我電話突然響起，我發現有個好耐冇打畀我嘅朋友打畀我，我果下唔個聽唔聽好，突然間個心情變得百感交集