我次次拍拖都拍唔長，因為我……: 女鬼篇
話說頭先同阿希去咗醫院探佢朋友，見到隻好重怨氣嘅鬼，阿希話隻鬼係阿謙嘅女朋友，隻鬼睇落二十出頭，雖然擺出一個好惡嘅款，但個樣都眉清目秀，都算係一個靚女，我叫阿希聽日試下同佢溝通，勸佢收手，阿希話wtsapp咗畀阿謙，聽朝早會再去探佢，希望聽日順順利利
探完阿謙後我哋都番咗屋企，原來阿叔都一早番咗去，仲擺出一副生無可戀嘅樣，阿希問「做咩啊，死氣沈沈咁嘅樣，畀個八婆上司鬧完嚟？」佢話「慘過畀人鬧.....我今日lastday打算把握機會同個女同事表白，結果佢拒絕咗我」
阿希聽完之後鬆咗口氣，仲暗笑咗吓，睇嚟大叔拍唔成拖對佢嚟講係一個好消息，大叔問「你朋友點啊？有冇事？」
阿希好激動咁話「阿謙之所以病得咁嚴重，原來係畀鬼搞，有隻女鬼成日纏住佢」
大叔話「隻鬼係畀佢害死所以番嚟報仇？」阿希搖搖頭話「唔係啊，隻女鬼係佢女朋友....可能佢想帶埋阿謙一齊走」
大叔冷淡咁回咗句「哦，咁都控制唔到㗎啦」
阿希話「我聽日打算去搵隻鬼講數....」大叔話「你份人真係多管閑事，你知唔知畀鬼纏住係幾咁煩，成日惹埋啲蘇州屎上身，到時出事就知死」
阿希深深不忿咁講「你份人真係好撚冷血，果個話晒都我朋友，我點可能咩都唔做，睇住佢就咁死
」大叔話「隨便你啦，反正我講咩你都唔聽，祝你好運啦，不過以過來人嘅身份同你講，有好多嘢唔係你想控制就控制到，根本就整定」
阿希話「我唔認為係咁喎，我信人定勝天，如果咩都唔做就一定咩都改變唔到」