我次次拍拖都拍唔長，因為我……: 阿希篇

本身打算客客氣氣咁傾，但呢條臭格港女根本就唔係啲講道理嘅人嚟，所以我決定都唔講道理啦

我話「你想阿謙見到你再續未了緣姐，好簡單，我有方法佢會開到陰陽眼...」Emma半信半疑話「真係有方法？唔好呃我喎，你有修法？」

我話「我冇修法喎，我個方法仲簡單直接，佢畀我拮一吓就會睇到鬼？」

Emma擺出一個黑人問號嘅樣，阿儀個樣變咗唔撚係嘅樣，睇嚟阿儀明我講咩

Emma繼續問「拮一吓係咩意思⋯⋯打針？」我話「本身我都冇陰陽眼，但我同完一個有陰陽眼嘅人扑完嘢就睇到，之後就見到鬼...」





Emma大怒「死基佬真係基性難移，想作埋啲濕鳩故仔呃窿屌邊個會信你啊？」我話「呃你做咩撚？唔信你問吓我隔離果個」我指一指阿儀，阿儀點頭話「的確係，佢果日同人搞完基之後就見到鬼」

Emma話「就當你講嘅嘢係真，我點接受自己條仔同個男人扑嘢....」我插咀問「原因係咩？點解接受唔到，咁做你唔係就計劃通，可以同佢繼續再續前緣咩」

佢話「唔...唔可能同第個人扑嘢囉」我話「咁你又接受到佢陪你去死？你唔接受佢同第二個人扑嘢係因為佢對你嚟講係件完好嘅玩具，你要佢一齊死陪你都係自私，為自己啊」

佢即刻搏咀話「我愛佢先會想留佢係我身邊，永遠起埋一齊啊....」

我笑笑口反諷「咁點解你唔考慮下留係佢身邊守護住佢算，點解係都要帶埋佢去啊？愛？唔好同我講笑喇，如果你真係愛佢就唔會做啲咁嘅事啦」





Emma畀我串到口疾疾冇聲出，我繼續乘勝追擊，話「你所謂嘅愛都係為咗滿足自己慾望，根本冇諗過阿謙，仲要害人，你知唔知醜啊？」我完全唔理後果咁屌佢，但估唔到最後佢都搏唔到咀靜咗