我次次拍拖都拍唔長，因為我……: 阿希篇
經過阿謙畀鬼纏呢樣嘢之後，我領悟到一樣嘢，就係同人討價還價時必須保持氣勢，就算理虧都要不失霸氣
頭先對住阿叔用呢招都好似非常有效，嚇到佢冇聲出，搏唔到咀，平時以佢串過馬頭咕哩嘅性格一定會即搏咀不過講真，係到痴飲痴食又的確對阿叔嚟講負擔好大，佢都已經失業，我都想做啲嘢補償下佢，我打算問下老豆公司請唔請人，如果請人嘅話，可以介紹工畀阿叔做，等佢唔好做廢中
我wtsapp 私chat老豆問「老豆，你公司請唔請人啊？文員職位果類？」隔咗陣老豆覆「採購好似唔夠人用想請文員，做咩咁問，你想搵嘢做？」我話「唔係啊，朋友失業急住想搵工，佢三十歲頭，之前都係做文員」老豆話「哦，我幫你問下人吧，你等等」
過咗半個鐘，老豆覆我「你朋友聽日得唔得閒見工啊？我同事話最快可以聽日見佢」我擰轉面問大叔「我搵老豆幫手，幫你搭咗路，你聽日得唔得閒見工啊，佢公司請採購文員」佢本身好頹咁上緊求職網，聽到呢個好消息即刻停咗落嚟，話「好啊，得閒啊，公司係邊？份工要做啲咩？」
我轉發咗地址時間畀阿叔，之後話「喇，幫你搵到工啦，唔好再厭我係到白食白住」阿叔話「算你做到嘢喇，唉，希望聽日順順利利，一擊即中」