我次次拍拖都拍唔長，因為我……: 阿希篇

Yes計劃成功，本身約咗見聰哥見面費都要五舊水，當我仲沉思緊點樣嘔五百蚊出嚟果陣，突然靈機一觸，諗到問家姐攞，再者呢次係幫老豆問嘢，斷估佢都唔會唔肯畀，我隔咗陣同家姐講「聰哥覆咗我話聽日晏晝佢得閒，每次面談收費五百蚊」

家姐話「屌，咁撚貴㗎，見個面都五百...咁好搵，不如你都學法賺錢算啦，分分鐘發過豬頭」

老豆咁啱沖完涼係廁所出嚟，搭咀話「有咩賺錢大計發過豬頭？」家姐即刻兜「冇嘢，講緊夾錢買六合彩姐，呢期金多寶中咗實發過豬頭」之後趁老豆唔為意，隨手係銀包攞咗張五百蚊紙塞咗入我衫袋

老豆話「邊有咁易中啊，買咗咁多年最多咪中得果幾千蚊...」

我話「都係嘅，不過每人夾幾蚊買個希望姐」





老豆話「細佬，之前你咪托我幫你朋友搭路搵工嘅，我同事話佢見得唔錯，晏啲會通知請佢」

我話「好喎，見得成，佢終於唔洗成日怨天怨地成個怨婦咁」

老豆話「你朋友咩人嚟？好似大你好多吓，邊到識㗎」

家姐串串貢咁搭咀「人哋「機友」嚟，打機識，仲好好感情，呢排仲去咗人哋屋企住」

老豆話「咁friend,但去人屋企住會唔會阻到人啊？」





我話「係囉，屋企呢排咁多嘢，焗住我去人到暫住我都唔想打搞人㗎」

老豆用住責怪嘅眼神望住家姐話「係咪又趁我唔係到蝦阿細佬啊？」家姐慌忙咁講「冇啊，點敢蝦佢啊，我都有叫佢番嚟住啊」

我話「我朋友自己一個人住，我去投宿唔會阻到佢家人，再者佢呢排失業唔太開心，我先去陪下佢姐，呢排我都會繼續係佢到住」

老豆話「係啊，唔好係人哋到住咁耐啊，同埋有時請下人食飯，唔好畀人覺得你白食白住」之後佢攞左一千蚊塞咗畀我，都係老豆最錫我成日塞啲零用畀我

老豆之後話「時間差唔多，大家準備換衫，出發去食buffet」