我次次拍拖都拍唔長，因為我……: 阿希篇
話說家姐收到聰哥msg ，聰哥叫我地去佢鋪頭攞護身符同符粉，懶到出汁嘅家姐第一時間推卸責任，叫我去攞
佢話自己有嘢做唔得閒，收皮啦佢擺到明嫌遠，真係多籍口我同老豆講話約咗人交收嘢要出一出去，之後我就搭小巴去大埔搵聰哥，臨走果陣家姐話「見今日天氣咁好，我哋夜晚諗住燒嘢食，我同老豆會去街市買嘢」
原來所謂嘅有嘢做係去買餸，食屎啦佢不過我搭紅van 落大埔都好快，半個鐘左右都到，我去到聰哥鋪頭，聰哥當時忙緊，係鋪頭入面執緊嘢，我敲一敲門，聰哥聽到後打個眼色示意叫我入去，我當時見到佢枱頭有兩個大葫蘆，葫蘆上面都綁住幼幼嘅紅線，有啲似以前睇疆屍先生啲道具
聰哥話「啱啱執緊嘢有啲亂，唔好意思，你坐陣先」佢一手撇開啲葫蘆，隨手係木櫃到搬咗個石磨盅出嚟擺咗係枱面，仲攞咗啲符出嚟，呢啲符同屋企都符唔太似，睇落比較細，佢擺咗落枱頭嘅煙灰盅到，用火機將啲符燒到變咗灰，之後再將啲灰擺入石磨盅，用研杵將啲大粒嘅灰燼磨碎，之後再小心翼翼咁將啲符粉倒落一個細嘅透明密封膠袋入面，佢話「呢啲係符粉嚟，你睇下有冇機會加入你老豆飲緊嘅湯或飲品到，放心呢啲嘢唔會飲死人，你可以安心咁畀佢飲」佢畀咗包符粉我，我隨即放咗入褲袋
之後佢又係枱櫃到攞咗一塊鑲咗玉嘅鎖匙扣出嚟，佢話「呢塊玉器已經開咗光，可以僻邪擋煞，之後你老豆應該冇咁易中降頭」我問「點解老豆會畀人落降？知唔知係咩人做？」佢話「應該係情降嚟，講真對家又唔算出手重，佢落呢種降係咁多種情降中又唔算係最狠毒，只係會影響你老豆嘅異性緣，有啲勁嘅情降會令中降者身體變差，我見過有啲男人出去包二奶，個大婆對個老公落情降，整到個老公病到好嚴重，床都落唔到，要長期留係屋企」
我話「
洗唔洗咁陰毒啊，唔想個老公出去包二奶姐....」聰哥笑笑口話「係咁㗎喇，呢個世界咩人都有，所以你老豆中呢種降唔算係好嚴重，講番正題，呢件玉你要勾係你老豆嘅隨身物品到，例如鎖匙銀包」
我見大家傾得興起，打算向聰哥問下關於陳振聰嘅嘢，幫阿儀收下風，點知唔講好地地，一講聰哥連面色都變埋....