我次次拍拖都拍唔長，因為我……: 女鬼篇
咦，阿希咁早番嚟屋企嘅，佢朝早仲同我講佢今晚家庭樂，會晏啲先番嚟屋企，但宜家先四點鐘，我問佢「做咩咁早番嚟嘅？」
佢話「我知殺你個兇手去咗邊喇，我今日同聰哥傾偈，原來佢識陳振聰，仲講晒畀我聽關於佢嘅嘢....」
我急忙咁打斷佢話「佢宜家係邊啊？」阿希話「唔洗咁心急，我會將我知道嘅嘢講晒畀你知」
阿希話當年陳振聰同我起埋一齊果陣，已經識咗個富婆，仲背住我同個富婆一齊，可能係嫌我阻佢發達，所以佢同我攤牌想分手，點知我死纏爛打，佢最後就害死我，唔想我再煩住佢，但呢個世界真係風水輪流轉，富婆嘅家人知陳振聰唔係好人，覺得佢會害死富婆呃佢身家，所以先下手為強，搵人隊冧咗佢，再將佢條屍棄屍荒野，之後變咗鬼嘅陳振聰走番去以前修法嘅仙館到，想搵啲師兄弟幫佢報警，因為啲同門師兄弟都有陰陽眼，可以望到同佢溝通，點知冤家路窄，佢遇到聰哥，聰哥畀佢害到跛咗，所以一怒之下將佢收埋咗係法器入面困住佢，就係咁佢係葫蘆入面活咗廿幾年
聽完成件事之後，我覺得好傷心，當年我哋拍拖到就嚟談婚論嫁嘅階段，原來一切承諾都係假㗎，佢居然背住我去同第個女人起埋一齊，仲為咗第二個女人而殺我，冇諗過佢個人係咁卑鄙無恥，呢種被人出賣嘅感覺真係令我覺得好難受，但同時我又覺得真係好心涼，原來呢個世界上真係有報應，佢受番同我一樣嘅苦，死咗之後一直畀人困住失去自由
阿希話「咁你打算點？會唔會想見番佢一面？」我如釋重擔咁話「本身都好嬲，以為佢殺咗我後可以逍遙法外，點知佢已經獲得佢應有嘅報應，真係心都涼晒，講真啊，我都唔想再見番佢喇，因為見到佢只會令我諗起啲唔開心嘅嘢，宜家咁幾好啊，佢要承受一直被人囚禁嘅痛苦，對我嚟講呢個係最好嘅結局」
阿希拍一拍我膊頭話「你識咁諗就最好喇，最怕你諗唔開，放唔低」我話「好多謝你幫我搵出個真相，同埋講咗個衰人嘅下場我知，我諗....我都冇留係到嘅必要喇，我可以安心投胎，好多謝你呢段時間陪住我」阿希眼濕濕咁講「
你要走喇？我會唔捨得你」我話「係，都差唔多時候喇」阿希突然攬住我話「保重啊，希望下世可以遇番你，亦希望你將來嘅生活會開開心心」
呢次係我死咗之後第一次同活人擁抱，我覺得好溫暖，呢種溫暖唔止係來自佢嘅體溫，而係我感受到佢嘅愛，雖然識咗佢唔係好耐，但佢都對我好好，好似家人咁錫我，我在生果陣都父母都過咗生，我同兄妹啲關係又唔太好，我咁大個人真係好似第一次感受到呢種家庭溫暖
我話「你都要保重啊，如果真係鍾意大叔嘅話，就去馬喇，唔好令自己後悔」