[愛情] [校園] [足球] 我鐘意你　但係我唔可以同你一齊: 29.

望住啊婆坐上白車離開學校之後，我同D班嘅隊友坐左係休息區換衫休息。

啊行都仲係一句野都無講，個樣好嬲，好燥。

「對唔住大家，今場輸嘅係我，我唔應該暪住大家受左傷嘅事」我率先開口

「你自己知道你傷左，點解都仲要踼？我地後備都唔會輸比佢啦個一球？」啊行聽到後好大反應

「咁佢都唔係踼得好差姐，佢地個一球有練過，我地都輸得心服口服。下次傷左唔好踼就得啦」啊羊安慰道





「係囉係囉！啊朗都係想幫大家嬴波姐，唔好怪佢啦」啊銀亦幫我講說話

啊行聽到之後更加嬲，大力掉水樽係地下大鬧

「你傷左都仲要踼就已經係問題啦，我知呢一場嬴輸都唔重要，問題係你自私唔同我地講」

「我都道左歉啦，你仲想我點，再講，你依家都搞到啊婆咁，你知道我地就黎學界，點解仲要咁樣係後面落腳？」我反問啊行

雖然我都知道我有做錯，但我道完歉啊行都不停針住我都開始有啲燥





「我落腳關你咩事啊，你管好自己隻腳先啦」啊行聽到我講呢句野之後自己走左番上課室

淨底我地幾個同少部分觀眾係到，因為仲有下一場隔離組S班對Y班嘅比賽

我都明白今場的確後半段有就住就住踼，亦都係因為我大意令到輸左個一球，啊行其實講得無錯，其實我唔應該落場踼。

但我都因為啊行咁嘅出腳覺得有少少嬲，唔單止係因為學界嘅事，啊婆亦都係我最好嘅朋友，距離學界仲有三個月，唔知道我同啊婆會唔會好得番哂可以全力踼。

我望上看台，曉瑩已經唔係到，可能因為岩岩啊婆白車嘅事比老師叫走左？





「唔洗唔開心喎，你地之後實有得贏嘅」其中一個唔識嘅女師妹係我行番課室嘅時候安慰道

其實我真係無心情回覆佢，因為我仲未接受到輸呢個事實，我無理到佢直接行番左上去

番到課室，我飯都無食訓左係張枱到，諗緊今日發生嘅事

後面有人拍一拍醒我，其實我心情仲未平伏到 ，所以唔想有人煩住我。第一次拍我都無理到，直到佢不停拍，我先起身另轉頭。

「邊個係咁拍啊」我嬲嬲地咁問，一路另轉頭

「你隻腳點啊…」原來係曉瑩

「噢..對唔住啊我心情唔太好，所以岩岩第一次無理到你」

「唔緊要啊，我明白你依家唔開心。但我好擔心你隻腳啊所以好想問左你先！」曉瑩個擔心樣同係觀眾席嘅時候一樣





「我無事啊，應該休息一個禮拜就無事。反正下場都係下個月，依家輸埋可以真係休息啦哈哈」我嘗試用平常心咁講，但始終都仲未收拾到心情，曉瑩都發現到我語氣好失望

「嗯，我知你今日可能輸左，但我唔想你怪自己，因為我見到你用盡哂你嘅努力黎踢㗎啦！所以你係我眼中已經踢得好好啦！之後呢個禮拜都唔比做運動啊知唔知？」曉瑩行上前搭住我膊頭，望住我安慰道

我地對望住，我望到佢嘅眼神，有一種好陽光嘅感覺，笑住望我，比緊好多希望同正能量我，好似天使下凡咁。

我望到佢之後即刻無岩岩咁唔開心咁失望，勉強笑番出黎。

佢亦都望住我由本來雙眼無神變到笑番，佢都好開心，見到我無好似十分鐘前咁失落。

「我要出去上堂啦，笑番就好啦！拜拜啦嘻嘻」曉瑩揮手道

「拜拜！多謝你啊」我勉強笑住揮手道別





下午嘅鐘聲亦響起，我一陣間係要去其他課室上，今堂係經濟堂。平時我係同啊婆一班，但佢依家唔係到，我都有啲擔心佢嘅情況。

今日係經濟嘅小測，考左一半都仲未見到佢番黎。

「可能我真係唔應該踢，搞到依家同啊行又不和，波又輸埋」我自己諗

“ 咚咚 “ 呢個時候有人敲門

「入黎啦」啊sir示意

啊婆右手戴住石膏慢慢咁行入黎

佢黑哂面咁望住我，我擔心嘅感覺突然之間無哂，反而我覺得有啲搞笑。由佢入黎望住我之後我嘅憂慮樣即刻笑容重現。

我坐係最近老師枱嘅位，因為啊sir唔想佢阻到我地考試，所以叫啊婆坐住係老師枱先。





自從佢入左黎之後，我已經無望過份卷，因為佢包住隻手真係好好笑。啊婆見到我笑佢都示意左好 “善意” 嘅中指手勢比我

就係咁，我嘅小測最後係空左一半，小息嘅鐘聲都響起。

「我屌，依家我哋兩個都傷哂」啊婆落左堂即刻行上黎

「起碼你贏左場波，依家啊行仲嬲緊我」我無奈咁講

「但點解你傷左又唔同人講，你又係衰嘅」啊婆包住手引來好多目光同笑聲

我搖搖頭，「無計啦，你咁串，點樣唔出場先，我梗係就算傷左都照出黎同你搏過啦」

啊婆聽到我講完之後笑左一笑，然後講「咁你咪輸囉哈哈，我地個戰術係體育堂都練左好多次。」





「唉，如果我無傷？我一定快過啊賢好多，連個波都唔會比你搶到」

「都無計，依家最重要都係我地傷撚哂，遲啲學界都唔知點算」我嘆住氣講

隨小息之後，我同啊行都無再講過野，我同啊婆都係足球隊練波請左假，只係啊婆個假大好多。

曉瑩見我心情麻麻地都無點同我講野，我亦都無主動搵佢，好快就過左兩日。