[愛情] [校園] [足球] 我鐘意你 但係我唔可以同你一齊: 32.
我慢慢行出門口，曉瑩見到我行出去亦都好快另番轉頭比錢，但係我嘅視線一直都無離開過曉瑩
望住曉瑩嘅背影，我無意中甜笑左一下。唔知點解，呢幾日都無咩事可以令到我笑得咁開心，就算係校園嘅搞笑事，可能因為發生左班際嘅事之後，我都好似笑唔出咁
但係依家好簡單咁同曉瑩食下野，見到佢，我先可以發自真心咁笑。係望住佢背影呢一下，我就知道，我之前對曉瑩嘅感覺應該唔再係普通嘅好感，我更加肯定我係鐘意左黃曉瑩
「喂！又發呆！行啦我地」曉瑩已經比完錢行上黎我面前拍左一拍我
「我比番錢你啦！岩岩追你唔切啊」我同曉瑩講
正當我想係褲袋拎出銀包比番錢佢之際，曉瑩捉住左我隻手，阻止左我。我同曉瑩對望左一下，我首先開口講「唔係咁好嘅」然後嘗試繼續搵銀包
點知曉瑩捉得仲實，我再望住左佢，曉瑩無出聲但係佢塊面好紅，我慢慢係我褲袋伸番隻手出黎，「咁....咁...我朋友唔開心啊嘛，請你食糖水都唔得咩！」曉瑩終於講野
「好啦..我下次請番你！多謝哂啦！」我慢慢講完之後，「但係，原來你咁大力嘅咩....」我再更加慢咁講
「咩野大力，點解無啦啦話我大力嘅？」曉瑩望住我一頭霧水地問
我慢慢將視線由曉瑩紅卜卜嘅面孔慢慢向下望佢捉住緊我嘅手，曉瑩見我向下望亦都跟左我一齊望
「噢！唔好意思啊嘻嘻，我都唔係有心嘅嘻嘻」曉瑩伸一伸脷講然後鬆左手
「行啦！大力妹嘻嘻」我行前向後同曉瑩講
曉瑩追左上黎，然後再捉多左次我隻手「我唔係大力妹！唔比你咁叫我！」
「係！知道...好痛啊大力妹！」我大叫，點知曉瑩仲捉得大力左。
「係係係唔講啦，你放左手先鳴鳴，曉瑩姐好痛啊！」我求饒
曉瑩終於放左手，我地好似之前咁沿住海旁行番去曉瑩樓下， 今日大家嘅腳步都放得特別慢，可能因為我隻腳嘅問題
「你依家心情點啊，仲有冇唔開心啊？」曉瑩打破沉默
「你話完全無又真係呃你嘅，但係我依家知道應該點做，可能係驚佢哋會唔接受我嘅道歉掛」我望住個海講
我突然企左係到，雙眼嘅視線轉移到曉瑩度，然後講「但係唔知道點解，我同你一齊個感覺好舒服，我可以完全放低到任何煩惱，真係真心咁笑到出黎」
曉瑩聽到我講呢番說話之後，首先係面紅紅，無講到野。
我哋對視左好耐，曉瑩終於開口「其實我都覺得係，同你相處的確係好舒服，我都可以完全唔記得所有唔開心嘅嘢，但係我都想你可以同我分享你唔開心嘅事，因為我唔想你番到屋企自己一個嘅時候因為呢啲事唔開心，所以你之後有咩野都要同我講啊！知唔知！」
「知道啦，要你擔心我添...下次唔會㗎啦～我聽日就去同啊行道歉！」我無望住佢低頭講
曉瑩聽到我講野之後，都慢慢向住佢樓下大堂行，回左下頭向我講「我番去啦，你記住唔好踩單車番去啊！小心啲啊！聽日見啦！」
「聽日等我好消息啦～拜拜！今日多謝你啦！！」我大叫
曉瑩聽到之後都無再講野，微笑左一下就回頭行番去
我企左係到，直到曉瑩離開左我嘅視線我都無行過一步。突然好想時光倒流，第一次感覺仲未想走住，我仲會想見多一陣曉瑩
呢一種不捨嘅感覺我都係第一次，岩岩望住佢走嘅時候，其實我係真係唔捨得，時間好似特別快咁。有一種唔足夠嘅感覺，會想再見多陣，傾多一陣。
但係，始終我都係唔敢同佢講留住佢，一黎會好奇怪，二黎我唔知曉瑩諗緊啲乜，萬一佢唔想留耐啲係到我真係唔知到時點解釋。
企多左一陣我都截左架的士番屋企，其實都幾肉痛，如果唔係我隻腳傷左我都唔洗浪費呢三十蚊。
番到屋企，沖左個涼就攤左係床上面，因為都已經差唔多三點，聽日仲要番學。
訓前睇左陣手機，其中有一道訊息顯示住曉瑩搵我 2:30am ＂番到去未啊！我番到去準備訓啦＂
2:55 am ＂岩岩番到去沖完涼攤左上床啦＂我回覆
之後睇多左陣手機，見曉瑩都無覆到我應該都訓著左，好快我都播住片訓著左
第二朝，我今日比平時早左番學校，因為今日啲功課有啲多，所以我早左番去抄功課，費事又要遲交功課比人屌。
今日我比曉瑩同啊行都早到，啊婆更加唔洗講，我無等到佢，自己番左黎
正當我起勢抄緊功課嘅時候，曉瑩都番到黎，佢望到我早過佢好似好驚訝咁，雖然平時以我所知都係早我幾分鐘
「早晨啊」我同完曉瑩講就繼續光速抄我嘅功課
「早晨啊，點解你會咁早番到黎嘅」曉瑩問
我指一指我份功課「因為今日好多功課要交，唔想去個傻仔補做班」
「哈哈，傻瓜，咁你抄快啲啦！唔阻你住！」曉瑩笑住我咁講
呢個時候，啊行都番到黎，行過嘅時候我同佢眼神互相望左一下，我望到佢望住我嘅時候個樣都仲係有啲黑，唉
曉瑩都見到一切，佢拍左一拍我，示意我過去同佢道歉
「會唔會唔係太好住....佢好似仲係好嬲咁」我另轉頭同佢講
曉瑩聽到之後望左望後面嘅啊行，然後肯定咁同我講 「係依家㗎啦！你依家唔道歉佢之後只會更加嬲，放心啦，我係到望住你」佢拍左一拍我手，示意我過去
好啦，曉瑩其實無講錯，我依家唔道歉只會令啊行愈黎愈嬲，件事只會拖到愈黎愈大。
我鼓起勇氣，決定好要過去同啊行講清楚，為左我地之後嘅學界同我地嘅友誼，我企起身，一步一步向啊行坐係到嘅方向行