邊緣: 初遇

楊碧詩：聽日就陸運會啦，你緊唔緊張啊？

石貴欣：唔緊張啊，我好興奮喎，又唔使上堂。

楊碧詩：但係你有參加社接喎，4x100，你唔記得你上年100米跑到死狗咁咩～

石貴欣：。。。。你唔講我都唔記得咗添，不過是但啦，我都係俾人迫㗎咋嘛，一早講咗我跑唔到㗎，就算我跑得慢佢哋都冇得怪我啦～

楊碧詩：你講到你唔會盡力跑咁喎～





石貴近：點會喎。。。一定盡我全力㗎～～

楊碧詩：我一定信你㗎～我行嗰邊啊，咁我哋聽日喺車站等？

石貴欣：好啊，我再message你

我哋各自揮手拜拜，然後就各行各路返屋企

陸運會當日～





廣播：而家召集四社4×100米接力賽！請參加咗四社4×100米接力賽嘅同學去集合，唔該！

我慢慢咁樣行過去集合位置，話唔緊張就假嘅，點都代表自己個社個喎，如果因為我輸咗咁我都幾內疚㗎。。。

邊諗嘢邊行已經行到咗集合位置

啊嘉行過嚟搭住我膊頭：點啊，唔使緊張喎，雖然第一次參加，但係你要記住無論輸定贏，我哋都已經有分加。

石貴欣：師姐我真係搞唔掂㗎，我跑得好慢㗎。





啊嘉：放心，我會幫你追番！

廣播：2分鐘後正式開始4×100米接力賽，唔關事嘅同學唔該上返看台。

廣播：第一組嘅同學唔該準備，各就位

嗶！

我企喺第二棒嘅準備位置，望住第一棒跑緊過嚟，佢跑第一，我心情更加緊張。

但係時間唔容許我諗太多，因為對佢哋呢啲高手來講，100米只係需要10幾秒嘅時間，

好快就到我接棒，由原本嘅第一位，慢慢俾人追上。

第一棒跑嘅成績，就係因為我呢一個遲鈍嘅第二棒搞到退後左。





但係我都盡我嘅全力去跑，搏晒老命跑去第三棒。

第三棒接！

我終於都可以抖番啖氣，跑完我真係想原地瞓低。

我已經唔想知道成績係好定壞，講真我盡咗力真係問心無愧。

第一棒嘅師姐行咗過嚟，佢同我講：做得好好呀！

同佢講聲多謝之後，我就慢慢行返去集合位置。

嗰度係起點，亦都係公布成績嘅地方。





行返過去之後就見到阿嘉跑緊第一位！

本來我仲嫌自己跑得好慢，心情欠佳，但之後我即刻叮一聲！

石貴欣：加油啊！拎第一呀！

我同其他人一齊打氣！

最後！梗係我哋社贏咗啦，都係多得啊嘉咋

啊嘉輕微喘氣：都話我幫你追番㗎啦！下年再搵你參加啦

我上返去看台飲啖水，之後又聽到廣播

廣播：而家召集丙組女子跳遠，請參加咗女子跳遠嘅丙組同學即刻去沙地集合！





我聽到之後就即刻落去嗰度集合，我哋學校有一個規定，就係每個人都要參加最少一個個人比賽。

我就參加咗跳遠，中一嘅時候我參加過100米，以為好輕鬆，點知我跑最尾。

最後聽人講跳遠先至係最輕鬆，而且又唔會跑到死死下。所以我諗住嚟緊嗰幾年都係參加跳遠㗎啦。

我哋每個人最多可以參加三個個人項目，班際或者社際呢啲就參加幾多都冇所謂。

正當我行緊過去沙場嘅時候，隔離有幾個高中哥哥望住我。

我仲聽到其中一個話：嗰個咪啱啱跑第二棒嗰個妹妹

我望一望佢哋，佢哋都望返我，而且眼神無閃縮冇迴避。





我當下嘅心情係又有疑惑又有啲開心，估唔到啲高form都會留意我喎。

直至到我完咗成個跳遠項目之後，終於其中一個走咗過嚟

未知：喂，你係咪叫石貴欣呀？

我有少少愕然，留意我留意到知道我個名。。。

我就覺得呢個人好熟口面，慢慢醒起，呢個人我知佢係邊個。。。

係form1嘅時候，我嘅同班同學有一個大兩年嘅男仔追，男仔日日等佢放學，或者放break嘅時候會去我哋班房搵佢。

但係聽講個女仔冇接受到，原因係呢個男仔係間學校出咗名係USB

即係咩？唔使講得太白都知啦，即係而家嘅狗公囉。

石貴欣：唔係

我果斷否認，我唔想同啲狗公熟絡。

未知：咁你叫咩名啊？

我否認完已經掂行掂過，聽到佢依句都無再回頭，好彩我翻到看台佢都無走上黎我到。

我唔係無野做嫁，我其實係個啦啦隊員黎，比賽完我就翻去嗌口號。

到咗下午，就到我哋社際啦啦隊嘅比賽，每個社都會落場跳舞同埋喺看台嗌口號。

跳舞同嗌口號都好，只要係齊就可以拎高分。

我參加啦啦隊嘅原因都係因為有得跳舞咋嘛，我真係好鍾意跳舞～

話咁快四個社已經搞掂晒，贏咗嘅唔會好張揚咁公布出嚟。

淨係會偷偷地同我哋嘅社長講，然後第二日就會頒個獎杯俾我哋。

不過都唔會好多人知道，除非你特登走去問，先至會知道今年係邊一個社贏咗。

好快咁就過左個sports day。

每次完咗運動會，都會係我成個學年最攰嘅一日。

嗌口號嗌到聲沙，跳舞跳到腳軟，仲要全程曬住。

我冇中暑都算係咁啦～不過學校好彩都有良心，每逢陸運會完咗之後都會放一日假。

目的梗係俾我哋休養啦～如果咁啱陸運會係星期四搞嘅話，咁我哋仲會有三日假期添。

返到屋企我突然之間醒起今日嗰個男仔。。。

石貴欣：搞咩啊，佢唔係睇上左我呀。。。

我抱住一個唔係好耐煩嘅心情瞓着左。