《正好碰見妳在小便》: 第一篇
我係一個毒撚，不知不覺就係世界生存咗16年，係依個充滿偽善嘅世界裏面，我選擇唔同其他人同流合污，活係自己一個人嘅世界。
「陳灼鳩，又係到發白日夢！？要發夢唔該返屋企啦，依到學校嚟架！」一把女人聲突然震醒咗我成個人。
依位惡過雞乸嘅八婆Miss就係我嘅中文老師，出名鬧人大聲，手上面支咪根本就可有可無，只係為佢鬧人嘅時候增加兩分氣勢。
我用不屑嘅眼神瞪住依個八婆，雖然只係短暫一秒，但我腦海已經彈咗一千句可以用嚟鬧返佢嘅說話，對我嚟講，要破壞一個人嘅自尊心真係好簡單，不過我知道如果我出口鬧返佢，事情就會變到好麻煩，所以怕麻煩嘅我唔會選擇駁嘴。
「好對唔住⋯⋯」我微微底下頭說，卻感受到班上面同學奇異嘅視線，而汗水居然不自覺地從我後脖子滲透出來。
「居然講對唔住⋯⋯」
「真係廢⋯⋯」
「垃圾⋯⋯」一個坐在最後排的女同學反了一個白眼，然後扒在枱上睡覺。
廢？哈～依班人根本就唔明白我，如果我想嘅話，隨時都有能力駁嘴駁到依個八婆喊住咁跑返教員室。
只不過咁做對我無好處啫，仲會浪費埋我寶貴嘅口水，喺依間band3中嘅band3中學，完全唔值得我咁做。
「嗯？」此時，八婆miss王嘅眼神忽然從我身上移去，好像被其他東西吸引住了。
「陸嘉怡，開學一個星期你就瞓覺！？即刻起身！！！」佢攞起咪對住坐最後一排扒喺枱嗰個女仔咆哮起來。
「⋯⋯⋯⋯」
「⋯⋯⋯⋯」
Miss王講完之後過咗三秒，嗰個女仔依然無動於衷，好似真係瞓著咗一樣扒係到郁都唔郁。
班房嘅氣氛突然變得緊張，就好似只有八婆miss王對住空氣自言自語咁。
「⋯⋯」Miss王被無視後，感到不受尊重，心情更加不悅，於是就更大聲的再叫一次。
「陸嘉怡！！！你同我即刻起身！！！」
而我也挺肯定那個女孩只是在裝睡。
4E班嘅同學都被震撼班房嘅叫聲微微嚇親，你眼望我眼，然後扮作事不關己的看著Miss和那個女同學。
而我當然係繼續保持從容自若，正如剛才所說一樣，我隨時都有能力罵到嗰個八婆miss王喊住咁跑返去教員室，所以我根本就唔需要驚佢。
我將微微抖震嘅雙手放喺教科書上面，然後坐直條腰專心研究書本嘅知識。
依種情況最好就係唔好燒到我身上，雖然我有能力，但我唔打算幫依個女仔出頭喎。
整個班房都安靜得像暴風雨前的平靜一樣，無人會知道下一秒會發生乜嘢事。
八婆Miss 王狠狠的怒瞪著嗰個陸嘉怡，看來她也在想該如何解決這件事。
在這一刻，一位救星打破了這個僵局。
咔嚓～
「哈哈哈～啱啱二樓廁所爆水渠喎～」一個肥仔打開課室嘅門，對住4E班嘅同學嬉皮笑臉地說。
「爆水渠關你咩事呀！？返埋位坐！」Miss王隨即就瞪向佢，這個眼神嚇得肥仔急急腳的跑返座位。
「揭開書第三十一頁。」Miss王見罵了他一句就拿起粉筆繼續教書，緊張嘅氣氛亦隨之散去。
話說不知不覺就升到中四，我地學校高中同初中係分開兩個校舍，兩個校舍嘅老師都係唔同嘅，所以好多時候都只係聽啲師兄講過高中邊個老師惡，邊個老師教得好，而依位八婆Miss王當然係榜上有名嘅惡老師，先開學一個星期就已經見識到佢鬧人嘅風采。
「孔乙己因為偷書俾人打斷咗腳。」Miss王拿著教學書講到一半嘅時候，小息嘅鐘聲就響起咗。
「好啦，今日講住咁多先。班長，幫我將工作紙傳出去呀。」Miss王攞起一疊厚厚嘅工作紙交俾坐係最前嘅男班長，同學們頓時眼都大埋。
「吓？今日就有功課？」
「啱啱開學無耐咋喎⋯⋯」
「唔好啦Miss～」
Miss王托一托佢副金絲眼鏡，看著惶懼不安嘅同學淡然地說：「你地E班嘅同學已經係學校入面最差嘅學生，以前係初中嘻嘻哈哈唔肯讀書都算，但估唔到升到上高中都想輕輕鬆鬆咁過，連派張工作紙都要抱怨。其實學校都無咩資源養你地依班人，功課都唔想做大可以唔讀。」
此話一出，全班學生都臉色表現出不滿，除了幾位同學臉不改色，包括一開口就可以收老師皮，IQ二千嘅我，同埋啱啱先瞓醒嘅陸嘉怡，仲有幾個對於做功課依件事無咩所謂嘅同學。
啱啱瞓覺嘅陸嘉怡微微伸咗個懶腰，然後就企咗起身準備行出班房。
對於陸嘉怡完全無視自己嘅行為，Miss王當然視佢為眼中釘。
「你，啱啱瞓得好開心喎。」
「係呀Miss。」陸嘉怡聲音有點懶洋洋，啱啱瞓醒嘅佢口水都未抹乾。
她隨便輕撓一下頭髮，眼尾沒有瞧過Miss王一眼就繼續行，完全表現出不良學生嘅模樣，應該說是不良學生的典範。
此時的Miss王被她的發言氣得牙咬咬，怒火中燒地說：「跟我過嚟教員室！」
然後就一手拉住陸嘉怡隻手，另一手攞住一袋嘢氣衝衝咁走咗。
「吓？我要去廁所喎！」
「唔準去住！」
就這樣Miss王留下一句說話和一疊孔乙己的工作紙便離我們而去，全班頓時鬆一口氣。
「呼～個八婆終於走咗啦～」
「不過嗰個陸嘉怡真係夠薑。」
「緊係啦，初中嘅時候佢已經出名曳架啦！」
「係咩？」
「咩返學遲到早退欠交功課樣樣做齊。」
「咁都升到中四？」
可能人地成績好呢～
「喂鳩！有無八達通呀？」剛才被罵的那個肥仔靠到我桌子前好奇地問。
被突如其來嘅發問，我嚇咗一跳：「有呀⋯做咩呀？」
我記得佢個名好似叫做胡冬瓜？
「借嚟用一用得唔得呀～樓下小食部仲未開，部嘢飲機又唔收銀仔。」他雙手合十微微搖晃身體，一副可憐的樣子，十足十動漫入面啲可愛學妹問學長哥哥借嘢咁。
依個時候我選擇合起雙眼，而拳頭不自覺地握緊起來⋯⋯如果佢加多句お兄ちゃん我絕對會彈起身打柒佢。
「是但啦⋯⋯」我克制住自己，眼睛移開咗佢嘅視線，然後企咗起身。
雖然我有一億種方法叫依個肥仔問其他人借，不過我頭先正想去買嘢飲，所以今次算啦⋯⋯