《愛在。貴族學園》: Ch 3 ~ 對好友嘅求助 Part 3

Ch 3 ~ 對好友嘅求助 Part 3（連載日期：2021/09/17）

（繼續張韻喬視角）

話咁快，就去到放學嘅時間。當然，正如我提過，喺頭先lunch嘅時候，我都有問其他女同學嘅意見嘅。

由佢地嘅口中，同埋部分佢地同林俊軒對話嘅内容所知，其實都覺得我可以放心將自己個電話號碼畀咗林俊軒。

雖然佢都有約其他女仔行街食飯，或者口花花調戲下佢地咁。但都冇做過咩越界嘅嘢。





「啊，點解今日會有咁多功課咖？今晚點可能做得哂，同埋邊度有時間溫書呀？」喺執書包嘅時候，我居然同殷殷呢個懶惰鬼抱怨。
 
殷殷都好難相信呢句説話出自我口中，然後笑笑口咁答我「嘩！原來天才喬都會有想偷懶唔做功課嘅時候咖喎！睇黎我地都終於有嘢可以證明到，張韻喬其實都係一個人，in stead of係一位神，哈哈哈哈！」
 
我聽到之後就好不滿，李天殷喺度笑人嘅！所以我嘟住個嘴講「咩偷懶啊？你估個個都好似你咩？！下下都想問人抄……唔係，係“參考”功課」

其實想偷懶嗰個一定係李小姐啦，你估我真係唔知你想點咩「我係話呀呢兩日都已經有好多quiz，班老師仲喺度畀咁多功課我地，都唔知係咪想快啲將我地帶入DSE狀態就真。」
 
「仲有呀，我再三強調一次，我都係一個普通人黎咖咋！都唔知你地做乜鬼，係都要喺度神化我，你地好鍾意喺學校崇拜我咩？！我有咩咁好畀你地班有錢人當我神咁拜呀？！教主呀依家？！！」我繼續一輪嘴、瘋狂咁向天殷開火。





不過，天殷呢個死妹釘居然繼續駁我嘴「哈哈，就憑住你喺咁多年，都包攬哂學校嘅獎助學金，外加你嘅成績極度優異，人緣又好，樣靚身材正，就已經夠班男仔去留意你啦，我地貼地嘅平民女神！」

「乜嘢貼地嘅平民女神呀？你地好煩好無聊囉好冇？我都話咗我唔係咩女神囉！」我再一次非常不滿咁講。

「喂，你咁鬼多口水，到底你仲走唔走咖？一陣搞到我班巴士走咗，或者上唔到車嘅話就唯你是問啊下！」

「得得得！依家走依家走！如果你班巴士走咗，最多我咪返出黎車你」

「你係做得出至好呀！唔好又係得個講字呀！」其實我都知道天殷一定做唔到啦。





不過，就喺我同天殷各自執好書包離開班房，準備去locker嘅時候……
 
「BANG!」「啊」喔，原來我唔小心撞到人啊，佢手上啲書被我撞到一地都係。

不過睇真啲，原……原來係林俊軒同學嘅書。

唉呀，點解咁多人唔撞，係都要撞到佢咖？！今次真係黑仔到一個點呀！
 
「啊，唔好意思啊林俊軒同學，我唔係有心整跌你啲書咖」既然係我自己做錯，我唯有連忙同林俊軒同學表示歉意，同一時間都主動提出幫忙「不如我幫你執返起佢地啊？」
 
「唔緊要啦張韻喬同學，係我自己睇唔到你經過啫。不如我同你一齊執啦？」林俊軒想安慰我，佢其實都好有風度嘅，應該（好似）話對每個女同學都好有所謂嘅風度囉。

不過，我見到佢望我嘅時候，好似好緊張咁。
 
「唔該哂。」執完之後，佢就話「啊，張韻喬同學」





「係，有咩事我可以幫到你咖？」我就望實眼前呢個無敵flirt女王，睇下你有咩花臣想搞「張同學，我….呃…我….可唔…..可以….要」
 
「你想要咩啊？講到一舊舊咁」我大概都估到佢想要我電話號碼咖啦，不過就算你點講都好，聽見殷殷同其他人意見，我都應該會俾佢咖啦，於是裝作好奇咁問。但係……
 
「嗯….都係冇嘢啦，聽日返學再見啦, bye bye。」講完林俊軒就急急腳離開咗班房。
 
「bye bye, 聽日見啦」哼！你條友仔居然咁鬼細膽都有嘅，問我要個電話號碼啫，居然都唔敢親口問。

哈！原來呢條友仔講就天下無敵，做就完全係一個碌撚。真係冇鬼用呀！都唔知係咪男仔黎咖！

不過，頭先我望住佢嘅時候，點解佢又會咁緊張，塊面仲已經紅哂咁嘅？而我自己點解又好似覺得有少少尷尬咁嘅？

哎呀張韻喬呀，你都真係唔好再喺度亂諗啦，今日都已經好幾次咖啦，你係唔可能而且唔可以對呢個賤人有感覺咖！





但結果我都係做唔到，因為喺巴士上面，甚至返到屋企之後，我間唔中都醒起今日喺學校發生嘅事，連想claim down嘅機會都冇。我都好似咁大個女，都未試過有呢種感覺，唔通……

算啦，你都係早啲訓啦張韻喬，唔好再諗啦！

（Ch 3 對好友嘅求助~完）

IG link https://instagram.com/bear_big_big_writer