《愛在。貴族學園》: Ch 6 ~ 張韻喬同學，請你幫一幫忙吧（下） Part 3

Ch 6 ~ 張韻喬同學，請你幫一幫忙吧（下） Part 3（連載日期：2021/10/12）

「呢兩日呀？嗯…我都好似冇咩做喎，除咗溫書之外。做咩呀殷殷？你想同我放學之後去行街買嘢呀？好呀！」韻喬依然非常天真咁問好姐妹。

「唔係啦小喬，我嘅身份咁敏感，我媽媽又點會畀我放學，或者weekend自己走去行街呀！」天殷用略帶抱怨嘅語氣回答韻喬。

但聰明嘅韻喬開始意識到，天殷所求嘅事情唔係咁簡單，於是面色都變得認真起黎「咁係咩事想問我？」

眼見韻喬一面認真時候嘅氣場，天殷都開始有少少驚，所以都嚇到窒一窒。





「係咁嘅啊…小喬，我其實想問，你今日放學之後，如果有時間嘅話，可唔可以請你幫我地班軒仔做一樣嘢啊?」

韻喬一臉疑惑，繼續好認真咁望住天殷「軒仔？你係話……林俊軒同學？做咩事無啦啦有嘢要我幫佢嘅？」

「不如你講出黎我知，等我考慮一下先得唔得呀？」

於是天殷就開始求韻喬，而俊軒嗰邊都好緊張咁留意。

「其實我知道你喺知道之後，可能會好委屈，甚至可能會覺得嬲同唔公平。」





「但係，今次我都想你可以幫到佢，希望你可以念在我地兩姐妹之情，當係俾個面我去應承佢，可以嗎喬喬？」
 
「咁你都要講咗係咩先，我先至可以考慮應唔應承咖殷殷！」韻喬一邊講一邊繼續睇書。

「今日夜晚，可唔可以抽時間去林家，出席林家嘅晚宴，而我想你幫忙嘅，就係你要扮軒仔嘅女朋友，唔知你……可唔可以應承我地...」天殷非常咁，直接講出請求嘅内容。
 
然而，韻喬就面色一沉，隔左差唔多成十秒先再講嘢...

「本來，我都應該有時間嘅，陪林俊軒出席林家嘅宴會，我自己都問題唔大。但係，點解要咁做，要我扮林俊軒嘅女朋友去出席呢呢？我唔明喎李天殷！」
 




天殷雖然真係好驚，但係佢都要誠實咁同韻喬講「因為…..因為軒仔佢…唔想畀林auntie逼佢去單身party相睇，於是…..」

「於是林俊軒就同林auntie講，話有自己女朋友，然後林auntie就話想見下嗰個“女朋友”，再同佢食餐飯咁？」

聰明嘅韻喬已經知道天殷想講咩，所以就幫佢接埋落去。

而天殷對於韻喬嘅聰明表示非常驚嘆「喬喬，你真係真係太聰明啦，你連我想講咩你都差唔多知道哂！」
 
「哈！多謝你讚我。小妹我呢，就一向都冰雪聰明嘅，不然我個第一點樣可以keep住呀？而且，呢啲咁似大台劇集嘅垃圾套路，我又點會估唔到呀？」韻喬沾沾自喜道。

「不過我估唔到嘅係，原來個死人頭林俊軒咁鬼老土咖喎哈哈哈。之後呢？」韻喬繼續追問，變咗有少少想食花生。
 
「之後，林太就要求軒仔，喺今個星期之内，帶埋個“女朋友”返屋企同佢地食餐飯，證明軒仔佢冇講大話。否則軒仔佢就……party見咖啦…..」天殷講埋韻喬估中大半嘅下半part。
 
韻喬聽完就喺度笑，但係好快又收起笑容「雖然聽落就真係幾好笑嘅......」





「不過都係對唔住啦，殷殷。我諗我要拒絕你嘅提議」最壞嘅事情都係要發生，而且韻喬都好直接咁拒絕，立場仲好堅定。

「我完全諗唔到個我要幫佢講大話嘅理由，甚至要犧牲我自己感情狀態去幫玩大咗嘅佢。」

「如果真係想搵個女仔去扮自己個“女朋友“嘅話，你叫佢搵其他女同學幫手啦，反正，佢唔係有哂全級女仔嘅電話號碼啦咩？」
 
天殷聽到韻喬咁快拒絕都不感意外，但因為要繼續游說，所以都要扮下無奈......

「其實軒仔佢係有搵過其他女同學咖，不過就全部都拒絕哂呢！」

「咁殷殷你呢？點解你自己唔應承呀？」韻喬反問天殷。

「咁係因為我屋企同林家關係非常密切，班大人係生意夥伴黎，我同軒仔兩個係咩關係、平時喺學校做咩，佢地都瞭如指掌，所以今次我都有心無力啦......」





「黎啦，就幫一次咁多啦喬喬，幫幫手啦好嗎？」天殷雙眼開始紅，試圖用淚水攻勢，逼韻喬破防。而俊軒同禮謙兩個，自然就臉如死灰，不發一言。
 
「但係其他人可以拒絕林俊軒嘅無理要求，不過點解到我就唔可以呀！？咁樣真係公平咩？」

「定係因為我屋企冇你地環境咁好，所以你地幾個就要蝦我啦喎？」韻喬咁認真嘅態度都嚇怕咗天殷，於是都要即刻出面澄清…...

「唔係呀唔係呀，只不過我地真係冇哂其他辦法啦，絕對唔關你屋企事咖！」

「咁殷殷你都唔使咁緊張住。不過，總之你地諗都唔好諗啊！你地就算要打死我，我都唔會幫佢咖，鬼叫自己講個carry唔到嘅大話吹到咁大呀！」韻喬再一次好堅決咁拒絕天殷。
 
「喺我一知道呢個計劃嘅時候，我其實都有話過佢咖啦。但係今次已經係無辦法之中嘅辦法。」

「所以喬喬呀，就當李家大小姐我求下你啦，好嗎？」天殷繼續努力希望韻喬答應幫忙。
 
「NO WAY！」韻喬再一次非常狠心咁拒絕天殷，但同一時間上堂嘅鐘聲都響起，於是韻喬就話「上堂先啦，唔好再講呢件事住，可以嗎？」





「好啦……」不過，其實韻喬見到天殷咁可憐，夾喺自己同俊軒中間，都已經有少少心軟。

但礙於要幫嘅人因為係俊軒，所以韻喬覺得點都要強硬一下，免得自己應承過對方一次之後，其他人或者俊軒之後會變本加厲。

當然，韻喬都要對俊軒下個馬威啦，當係警告俊軒到時候唔好對自己亂黎。
 
至於遠處嘅俊軒同禮謙，聽到韻喬咁講都冇哂心機。

但同一時間，俊軒都開始盤算下一個計劃，務求令韻喬一定會應承自己......

（Ch 6 張韻喬同學，請你幫一幫忙吧 （下） ~  完）

IG link https://instagram.com/bear_big_big_writer