《愛在。貴族學園》: Ch 7 ~ 綁架 Part 5

Ch 7 ~ 綁架 Part 5（連載日期：2021/10/24）

過咗一陣，座駕就返到去李家大宅。喺將座駕停低喺門口之後，蕭管家就送上溫馨提示畀佢地兩個「兩位小姐，我地返到啦，落車嘅時候記得小心啲」

「知道，唔該蕭管家！」兩個女仔同時回答，然後就行入大宅裏面。
 
李家大宅就係一間獨立屋，起喺飛鵝山山腰上，由大宅上面望落去，基本上大宅坐擁九龍市區嘅無敵景致，而且外表具有少量氣派，明眼人一睇就知大宅主人非富則貴。
 
喺經過大宅門口嘅工人問候之後，「喬喬，我帶你上我間房先吖！」「好呀，唔該殷殷」天殷於是就拖住韻喬上自己房。





喺上去嘅時候，天殷就開始睇Singal，問下俊軒同禮謙嗰邊嘅環境如何。
 
「謙謙王子：早晨啊殷殷！我依家喺度搵緊衫，之後會去沖個涼，然之後就等學霸軒佢黎接我         14:10」禮謙首先回應天殷。

「5A林俊軒：殷殷，我已經同咗譚管家講，一陣會多兩個人食飯咖啦，但我媽今日一早出咗去，依家又未返到所以未講          14:13」

「5A林俊軒：至於我自己，我過多陣就會換衫，然後準備去謙謙度！      14:14」俊軒都隨即應機。

「謙謙王子：OK！咁你差唔多去到我屋企之後，你再話我知道啦，唔該軒軒！       14:16」
 




天殷對於兩位男子組嘅進度都非常滿意，於是就回覆話

「5A李天殷：非常好呀兩位，咁一切繼續按原定計劃進行。軒軒你出門口嘅時候hi一hi我，因為我同小喬都要時間set妝同換衫！       14:17」

「5A林俊軒：知道啦李家大小姐        14:18」

不過，就喺天殷掛住答兩個男仔message嘅時候，韻喬就突然之間問天殷「殷殷，你做咩好似好忙咁嘅？」

「係……係咩？」「我見你由入屋之後就不停喺度撳電話囉」韻喬再答天殷道。





天殷於是隨即作咗個大話出黎「哦，因為我媽媽用我個account，喺網上面買咗啲嘢，咁個賣家準備出貨，所以咪要同個賣家聯絡囉」

但好彩嘅係，韻喬都接受呢個解釋「原來，不過估唔到你媽媽，都會好似我地咁會上網買嘢」

「哈哈，今時唔同往日啦小喬」天殷非常大聲咁笑「我地其實有時候都會淘寶咖，唔好以為我地只會去啲名貴百貨公司度買嘢，我地冇咁誇張咖！」「點知你地啫」
 
講下講下，佢地兩個已經去到天殷嘅睡房，不過韻喬嘅反應都仲係咁大

「嘩，你間房好似靚咗咁多嘅！」韻喬入到天殷間房之後好驚訝，眼睛都變成心心眼咁「根本就係迪士尼童話設計！好粉紅好夢幻哦，而且私人洗手間都唔同咗…..」
 
「哈哈，還好啦，之前因為我間房有裝修過吖嘛，所以咪有少少唔同咗囉，多謝你咁欣賞我間房嘅設計喎」天殷有少少怕醜，面紅紅咁回答

「不過，如果你鍾意我間房嘅，咪喺放長假嘅時候，上黎我呢度過幾晚夜囉，順便可以陪我通宵girls talk呀嘻嘻！」
 
「如果……我都有咁大間房嘅話，就好啦」韻喬一邊望住窗外嘅風景，若有所思咁講





「不過，如果我成日上黎過夜嘅話，我怕我會阻住你地屋企人之餘，我仲怕你地屋企人唔鍾意」
 
「唔會唔會，放心啦！我媽ok嘅，而且我媽媽都好似幾鍾意你咁，成日都叫我邀請你上黎食餐飯」天殷從後搭住韻喬嘅膊頭，一邊好高興咁講。

韻喬聽到之後都有少少高興，於是就話「咁幫我同auntie講聲多謝啦，都係你地唔嫌棄我身份啫」

「哎呀唔好自卑啦喬喬」天殷再次糾正韻喬嘅諗法「其實啊，喺學校裏面，都幾乎冇人再敢用你嘅身份去炒作話題啦，你就唔好再諗太多啦」

「但係，你地嘅世界，好多嘢我都唔識，搞到我喺你地面前，好似好失禮咁」韻喬居然繼續喺度放負。

「唔會嘅，如果你真係要去呢啲場合嘅話，最多咪掉返轉，由我地黎carry你咪得囉，一定冇問題嘅，放心！」天殷捉住韻喬嘅手道。

「多謝你先」韻喬非常有禮貌咁回應，但同時都興起一樣嘢「殷殷呀，你頭先又話尋日Ms張教《六國論》嗰陣有嘢唔識嘅？」





「係呀，喬喬！」「係就快啲啦，趁我依家仲有印象嗰陣教咗你先啦！如果唔係我真係唔記得就麻煩啦！」

「好呀，小喬，不過你既然身為學霸，老師教過嘅嘢，你又邊會咁容易話唔記得就唔記得呢？」

「喂呀笑人嘅！而且我係你口中嘅天才，而唔係學霸呀！」韻喬嘟起個嘴表示不滿，但喺講完之後，佢地兩個女仔就坐喺書枱前面，開始溫習。
 
「咯咯……」喺過咗20分鐘之後，突然之間有人敲門。

（待續 ~）

IG link https://instagram.com/bear_big_big_writer