《愛在。貴族學園》: Ch 8 ~ 逃過一劫的吻 Part 6

Ch 8 ~ 逃過一劫的吻 Part 6（連載日期：2021/11/21）

「哎呀小喬、小軒，你地兩個咁快就喺我同禮謙兩隻單身狗面前，喺度打情駡俏啦？咁樣以後喺學校仲得了嘅？」天殷好抵死咁講

「喂呀殷殷呀，你都明知發生咩事啦，你都仲喺度笑埋我一份都有嘅？！」韻喬扁哂嘴咁講，同一時間塊面都已經紅哂

「都唔知呢啲係咩姐妹黎咖囉！？」「哈哈！姐妹就梗係同兄弟一樣，都係相愛相殺咖啦」
 
不過，今日嘅天殷就好似食咗藥咁，同平時比就變得異常興奮，於是又爆多一句話





「定其實小喬你真係鍾意咗小軒呀？係你就認咗佢啦！」

「喂呀！幾時有呀！星期一返到學校打死你呀啦！」韻喬個樣又嬲又無奈咁，成件事就好似好搞笑。

但就喺天殷同韻喬佢地討論得興高采烈嘅時候，一直喺身邊嘅禮謙突然爆出一句非常理性嘅説話

「大家冷靜少少先，雖然我見大家都相殺得好開心。但係，我有啲擔心俊軒媽媽可能會聽到我地講嘅嘢。」

韻喬同天殷聽到打側咗個頭，於是禮謙就繼續解釋「咁係因為依家小軒你媽媽行開咗啫，都唔代表大屋裏面冇其他人聽到嘛，包括小軒你屋企啲工人，點知佢地會唔會向林auntie打小報告咖？」





「所以我覺得，如果可以嘅話，依家我地不如講住其他話題先啦好冇？」

禮謙善意提醒衆人後，衆人都發現到呢個潛藏嘅危機，於是佢地都冇再focus喺今日俊軒同韻喬嘅話題之中，而係佢地又開始平常學校嘅話題，嘻嘻哈哈又講咗半個鐘。

但係正因為呢半個鐘頭，佢地幾個都開始更深嘅認識，包括韻喬同禮謙之間。

就喺同一時間，禮謙自己對韻喬嘅感覺，都開始有少少濃烈。

但係，禮謙都唔知點解，頭先傾計嘅時候，天殷都不停cue自己，而且仲坐得好埋。
 




就喺佢地講得高興嘅時候，譚管家就走入大廳，同佢地四個後生仔女講

「二少爺、張小姐、李小姐、程公子，晚飯已經差唔多預備好啦，麻煩你地幾位可以跟我去飯廳就坐。」

「知道，唔該譚管家」四人一齊回應後，譚管家就帶住四位先去洗手間洗手，之後去到林家大宅嘅飯廳，再指示佢地幾個去指定嘅座位度就座。

而喺飯枱上面，已經有餸菜放咗喺飯枱上面。
 
但去到飯廳嘅時候，韻喬就畀飯廳裏面嘅水晶吊燈深深吸引住。

俊軒見韻喬一直望住盞燈，於是就直接問韻喬「小喬，你好鍾意我地盞水晶吊燈呀？我見你入黎之後就一直望住佢咁嘅？」

畀俊軒發現之後，韻喬就變得非常尷尬，而且又面紅紅咁。不過韻喬都係有少少好奇，所以就好細聲問俊軒

「（唔係呀小軒，不過我見到呢盞燈，就覺得佢好靚，單純欣賞多幾眼啫。不過，咁大盞燈，會唔會好貴咖？）」




 
韻喬畢竟自己出身平凡，佢對於呢啲多數喺電影裏面，先會見到嘅有錢人嘅家居擺設同燈飾，自然會顯得比較好奇

「噢，呢盞燈係當年爸爸喺歐洲訂返黎嘅，又唔係話好貴嘅……」俊軒解釋道

「不過，如果小喬你鍾意嘅話，以後你就可以日日都見到呢盞燈，嘿嘿」俊軒又再講。

但係韻喬都知道俊軒呢句説話嘅意思，於是就好不滿咁話「（邊個話要日日都見到呢盞燈咖？！衰人！！）」然後韻喬又打咗俊軒一下。

（待續 ~）

IG link https://instagram.com/bear_big_big_writer