《愛在。貴族學園》: Ch 16 ~ 麻煩的一天 Part 3

Ch 16 ~ 麻煩的一天 Part 3（連載日期：2022/05/20）

返到福生大廈之後，「啊！終於都返到嚟啦….」韻喬親自用鎖匙，打開自己屋企門口嘅時候講「住咗幾日醫院真係會搞到周身唔聚財呀！」

大家入到屋之後，佢地幾個都將自己同韻喬嘅嘢放埋一邊。
 
「哈哈，咁就梗係係屋企舒服過喺醫院啦，有邊個會鍾意住醫院先得咖！不過小喬啊，你以後真係要好好照顧自己啦，唔好再因為咁搞到要入醫院啦！」禮謙坐低之後，好語重心長咁講。
 
「唉呀救命呀程禮謙，做咩連你都學埋林俊軒一樣，咁後生就做爸爸，咁長氣都有嘅！」韻喬笑禮謙笑到失控掩面。





當然，畀韻喬咁樣用競爭對手同自己比較，禮謙心裏面自然不是味兒，哪怕比較對象係曾經嘅死黨。
 
「因為，你一定明嘅…..大家點諗你都應該知咖…」俊軒好明顯喺度暗示緊，自己同禮謙都喺度追緊韻喬，一時間又搞到大家都非常尷尬而靜咗落嚟。
 
「好啦，喬喬你又話自己周身唔聚財，就快啲去沖涼洗頭先啦，其他嘢就我地幾個幫你搞得咖啦！」面對瞬間凝結嘅空氣，天殷決定出手打圓場，然後韻喬好快就去洗手間冲涼，但喺入去之前，韻喬都有同佢地講唔該。

當洗手間裏面傳出水龍頭嘅聲音......

「喂！好心你地兩個，就唔好喺小喬一出院返到屋企，就喺人地屋企度勾心鬥角啦！萬一小喬見到你地咁而唔開心嘅話，等陣佢又一次唔照顧好自己，又開始病就麻煩啦！」天殷好認真咁喺度鬧俊軒。
 




「對唔住，不過我頭先真係想玩下禮謙…..」俊軒試圖解釋，當然禮謙都即刻黑喺口面，但就喺準備對俊軒還擊之時，畀天殷截停咗。
 
「大佬呀，你依家幾歲呀？！你估你依家仲係小學雞呀？！有啲嘢唔係講玩咖，而且依家都唔係玩呢啲嘅時候呀！林俊軒，我希望你明白我嘅意思！」天殷再道，而俊軒好快都話「明白！」

但係由於天殷頭先應承過會幫韻喬執下其他嘢，所以天殷好快就話……

「林俊軒，麻煩幫小喬手，將佢着過嘅衫褲，全部都放入洗衣機啦，之後等陣等小喬自己set部洗衣機。另外，禮謙，拜托去睇下雪櫃裏面啲菜呀、肉呀之類過咗期未。如果過咗期嘅就掉咗佢啦，唔該你！」天殷咁畀嘢佢地做，好明顯都係唔想兩個再喺度爭。

不過好在張家嘅雪櫃新鮮食物唔多，禮謙檢查完一大輪之後，都只係掉咗一盒變壞嘅瘦肉，同埋一袋發黃咗嘅菜心。





而俊軒都好快咁幫韻喬將喺醫院着過嘅衫褲放入洗衣機度。搞掂之後，佢地幾個就坐喺客廳度休息等韻喬出嚟。
 
「喂，又唔好咁靜啦你地兩個，不如幫手諗下，今晚到底同小喬食咩，同佢慶祝出院好冇？」天殷見兩個男仔繼續零交流，所以就專登喺度問佢地意見。

「不如…我地去打邊爐？依家出面又有啲涼，打邊爐可以暖下身又可以食得開心，但係唔知呢度附近有冇酒樓呢？」禮謙首先提議道。

「都可以呀謙謙，就好似你話天氣涼，打邊爐可以暖下身，而且食其他嘢嘅話，我都怕小喬未食得住。」俊軒和應禮謙嘅睇法「殷殷，咁你覺得點呀？」

「我覺得都ok呀其實，我諗點都好過去食pizza或者壽司嘅，但係依家小喬又冲緊涼，不如我地一陣間先再問下小喬先啦？」天殷道。

「好呀，始終小喬先係主角，而且又係地膽，可以聽下佢意見再算啦！」兩個男仔講完呢句之後都冇再講嘢，繼續靜靜等韻喬冲好涼。
 
過多15分鐘，韻喬就沖好涼出嚟，喺等韻喬吹好頭之後，天殷就開口問「小喬呀，我地想問呢，呢度附近有冇酒樓夜晚可以打邊爐咖？另外，小軒頭先已經幫你將啲衫放咗入洗衣機啦，等你自己set。」
 
「好，唔該哂殷殷、小軒。至於可以打邊爐嘅酒樓呀……呢頭就應該冇啦。但係如果你地想打邊爐嘅話，就可以去樓下嗰間餐廳啦！我都ok咖！」韻喬於是一邊較洗衣機一邊答道。




 
「既然小喬都話ok，咁就咁決定啦，不如過半個鐘落去啦，今晚早少少食啦，我怕小喬太夜嘅話會攰…」禮謙道。
 
「好！」另外三人道。之後大家都幫韻喬稍為打掃一下間屋，然後等韻喬換好衫之後，就出去打邊爐。

（待續 ~）

IG link https://instagram.com/bear_big_big_writer