《愛在。貴族學園》: Ch 16 ~ 麻煩的一天 Part 12

Ch 16 ~ 麻煩的一天 Part 12（連載日期：2022/06/08）

韻喬於是就點點頭，但心裏面都怕會hurt到禮謙，於是就話「係…係啊，不過呢，我會同俊軒一齊去呀！所以唔好意思啦謙謙，不過我都好多謝你，邀請我陪同你地家人出席…」韻喬呢句說話，基本上都打咗禮謙一槍。

「不過我覺得，如果你想有個伴陪你嘅話，不如，你就同殷殷一齊去啦，反正我記得佢都話聽晚會去嘅！」韻喬向禮謙提出反提議。

「咩話？！你會同俊軒一齊去？」禮謙此時已經唔能夠相信自己隻耳仔，因為佢再一次畀個死黨快咗一步「但係小喬，唔知你介唔介意分享下，點解你要同俊軒去，而唔同我去嘅原因？」

「下，咪就係因為我係俊軒嘅“女朋友”囉，幾個禮拜之前嘅大龍鳳，你咁快唔記得咗啦？…..」韻喬好認真咁同禮謙呢個敗部解釋。





「而且就係因為林auntie都會去吖嘛，而林auntie係尋晚專登同俊軒講，話今日要喺學校同我講話叫我跟埋林家一齊去，咁所以為咗要交戲，我點都一定要做埋落去咖啦。」
 
「竟然係咁！嘖，今次又畀林俊軒快過我一步！」禮謙握實拳頭道，心中顯得非常不忿，但禮謙又唔想畀「不過，我都想問下，俊軒佢…係幾時問你咖？」
 
「咪就係頭先食完飯之後囉。不過其實我聽完之後，坦白啦，我都係麻麻地想去呢種場合咖咋！但冇計啦，都係因為要應付林auntie嘅關係，所以我先要逼住同佢去咖咋！今次真係唔好意思呀禮謙！」韻喬將心底嘅說話講出嚟，同時都再一次同禮謙道歉。

「冇問題呀，呢個好小事。不過，我都要聲明先呀小喬，其實我唔係唔記得幾個禮拜前嘅事，只不過係我冇諗過，你依家居然都仲要繼續扮佢個所謂“女朋友”啫。但既然你應承咗聽晚同俊軒去，咁我就就唔强逼你啦…」然而，禮謙喺講完呢句之後，腦裏面突然之間有一個諗法，所以就即刻問準備走嘅韻喬。

「小喬呀！」「係！做咩呀？」「不如咁呀小喬，你聽晚唔同我去都唔緊要，但係擇日不如撞日，而且你尋日先病愈出院，倒不如今日就等謙謙我送你返屋企，當做係我小小嘅心意，好嗎？」
 




禮謙為咗可以再一次，有同韻喬獨處嘅機會，於是提出呢個邀請。一旁嘅韻喬聽到之後，即刻紅都面哂，久久都不發一言。

但係，喺冇幾遠附近嘅俊軒，聽到禮謙咁講之後，明顯有非常不滿嘅情緒，即刻由自己個位走出嚟「唔好意思喎，我林俊軒嘅女朋友，我自己會親自送返屋企，絕對唔會假手於人。有咩就聽日返學見到再講啦，程同學！小喬，我地行啦，我地司機已經喺下面等緊我地啦！」
 
俊軒嘅呢句充滿火藥味嘅說話，瞬間喺班房裏面，形成一股高氣壓。

韻喬聽到之後顯得非常尷尬，同時内心都有一種恐懼湧出，因為自己都預料到，一場爭奪自己嘅大戰又一次會發生。

但係，面對自己嘅好兄弟，居然講出如此挑釁性嘅說話，禮謙就算再好脾氣，今次都未必會忍得到，所以就質問俊軒...





「喂大哥，頭先好似係我問小喬要唔要我送佢返屋企先咖喎？你依家又插隻腳埋嚟，到底你咁做係有咩意思呢？」
 
「乜頭先你聽唔到咩？小喬係我嘅女朋友呀，咁就當然係由佢男朋友我送佢返屋企啦下話！」俊軒再一次喺大家面前宣示主權，而其他未走嘅同學，都即刻喺度議論紛紛。
 
「喂林俊軒你啊最好搞清楚咩事好喎！小喬當初只係應承幫你講大話，呃auntie做你女朋友同你去郭家個party，由始至終小喬都只係你假嘅女朋友嚟咋嘛！...」

「清醒啲啦你林俊軒！講大話講到自己不能自拔咁！小喬，唔好理佢啦，我地走！」禮謙突然爆seed道，其他同學都繼續喺度食花生。
 
俊軒聽到之後就更加不滿，始終覺得禮謙講咗啲唔出得街嘅說話。但俊軒唔想傷害韻喬，同將事件越描越黑，所以都冇去反駁禮謙嘅爆料，而係…

「小喬，跟我走！….」「都話小喬會跟我囉！….」俊軒同禮謙再次上演朝早小息時候嘅劇碼，再一次喺班房爭奪韻喬。

當然韻喬同去完locker返嚟嘅天殷，喺見到呢個近乎失控嘅場面之後，都感到非常尷尬。

（待續 ~）





IG link https://instagram.com/bear_big_big_writer