Ch 16 ~ 麻煩的一天 Part 19(連載日期:2022/06/24)

轉眼間,李家嘅座駕就差唔多去到北角,所以天殷就打電話,通知韻喬落樓等李家嘅座駕。但因為韻喬好快已經搞掂自己,所以韻喬好快都上咗李家座駕。

「唔該哂殷殷同司機,又要麻煩你地!」韻喬一上車就同天殷講。
 
「唔使唔該啦喬喬,成日都咁鬼客氣都有嘅!」「呢啲叫有禮貌而唔係客氣囉好唔好?」韻喬好快咁反駁天殷。

「好啦好啦,知道你好有禮貌啦!張韻喬。司機,麻煩車我地返屋企啦!唔該哂!」天殷吩咐司機道。司機揮手示意之後,就開車返回李家大宅。
 


「喂你點呀喬喬?仲有冇事呀?」開車之後,天殷伸出手拖住因為喊,而隻眼紅哂嘅韻喬講...

「哎喲陰功囉喬喬,你睇下你呀,喊到隻眼紅哂又腫埋」當然天殷都將自己塊面哄到好埋,好細心咁觀察韻喬。
 
「下係咩?不過我其實已經好啲咖啦殷殷,頭先真係多謝你打嚟聽我呻下,依家我都叫冷靜咗落嚟咖啦!」

「唔緊要啦,最緊要係你冇事就好咖啦!」天殷對住韻喬微笑。
 
「不過呢,其實頭先喺我過嚟嗰陣,我已經同俊軒、禮謙佢地兩個都講過,話今日嘅事其實好影響你心情,而且佢地都知道,佢地再咁做嘅話,你一定會為佢地喊同唔開心。而佢地兩個聽到你喊之後,兩個都覺得唔好意思。」天殷繼續講。
 


韻喬於是就即刻問「啊,咁……佢地有冇話要道歉先?」

「佢地又未喎!但係我自己就覺得,佢地都要親口同你道歉,咁先睇得出有冇誠意咖嘛,如果喺電話道歉就算嘅話,我會當冇道歉過囉!」天殷好認真咁答韻喬。

韻喬聽到天殷為自己做咁多之後,心裏面都好感激對方「嗯!多謝你呀,而且我都同意你嘅講法,希望佢地兩個真係知道錯,然後會改正啦。話說殷殷呀,我今日呢件衫好唔好睇呀?」韻喬指住自己件hoodie問天殷。
 
「唔…!呢種style我覺得幾fit你呀!而且你依家仲放埋頭髮落嚟,完全係成個女神咁嘅嘢!如果一陣試埋衫嘅話,哈!我好肯定你就真係不得了啦!」天殷喺講嘅時候都越來越興奮。
 
「你誇張啦你,口花花!李小姐,依家你做咩學埋哂啲男仔咁呀?」韻喬非常不滿咁講「你地呀,成日都三句唔埋就有兩句讚人好睇或者叫人女神呀!我覺得佢地班男仔真係好over囉!冇嚟正經!」韻喬已經講到白眼反上太空。
 


「仲有呀,上次我地去個死人頭屋企食飯“見家長”嘅時候,我咪已經着過晚裝裙囉畀你地睇啦,咁你仲喺度咁口花花做咩呀?!」韻喬繼續好不滿咁講。

「我冇口花花呀,咁喬喬你真係靚呀嘛!」天殷反駁之餘,繼續喺度將韻喬捧到上天花板咁,搞到韻喬都唔知點接,於是就話「車!冇你咁好氣!」
 
不過,因為佢地喺過海嘅時候,遇上東隧大塞車,所以座駕都要花比平時嘅時間更耐嘅行車時間,先返到李家大宅。

「呀!呢程車真係坐得耐呀!」天殷喺落車嘅時候開聲抱怨。

韻喬聽到天殷話車程耐之後,就即刻諗返起放學嘅時候,同俊軒、禮謙一齊坐巴士嘅死狗樣,於是都急不及待同天殷分享...

「哈!你知唔知呀,頭先嗰兩條友仔呀,只不過企咗40分鐘巴士咋嘛,去到一半就已經話頂唔順喎,真係冇鬼用呀!」

「咩話?咁搞笑!?哈哈哈哈!」天殷聽到之後都喺度大笑「真係估唔到佢地兩個咁冇用咖喎!」

「始終人不可以貌相呀嘛!」韻喬又再補多搶,然後再同天殷慢慢行入大宅度…



「小姐,歡迎回家。張小姐你好!」蕭管家道。「thanks!」天殷同韻喬同時回答蕭管家。

而喺入門口之後,天殷就同蕭管家講「蕭管家,麻煩一陣食飯嗰陣,你叫我地呀!記得要煮埋小喬嘅飯喎!我同小喬去房試衫先。」
 
「知道,小姐。咁我去做嘢先。」說罷,天殷就帶住韻喬,再一次上到自己房。

打開門之後,佢地可能需要用到嘅晚裝,都已經整齊咁掛咗喺衣架上面,但唯獨上次去林家食飯嘅時候,兩人分別着過嗰兩件晚裝,就冇放到出嚟。
 
韻喬於是細看,發現今次嘅晚裝比上次更加高貴豪華,睇到入哂神咁。

「嗱喬喬,呢度已經有十幾件喺度,你可以慢慢試呀!唔好客氣啦!」天殷坐喺化妝枱面前同韻喬講,而韻喬都好有禮貌話「真係唔該哂你呀!殷殷!」
 
不過,經過上次嗰種“奇怪”嘅經驗之後,韻喬都冇再喺天殷面前咁怕醜,喺揀好之後,韻喬直接喺天殷房裏面換衫。



佢地兩個都互相幫對方影低試裝照,方便可以再揀一件令自己望落最好睇嘅衫。

(待續 ~)

IG link https://instagram.com/bear_big_big_writer
已有 0 人追稿