《愛在。貴族學園》: Ch 17 ~ 大小姐駕到 Part 6

Ch 17 ~ 大小姐駕到 Part 6（連載日期：2022/07/11）

「不過我想講嘅……」

「你同我收聲呀死窮鬼！」但今次就到嘉惠非常粗暴咁，打斷韻喬嘅說話「依家係邊個批准你，畀你叫我做小嘉咖？...」

「我同你仲要全班同學講呀張韻喬，全班，唔係，係全校，就係得你你一個唔可以叫我做小嘉！因為你嘅身份，一啲唔配你咁稱呼我呀！」

所謂輸人唔輸陣（不過其實大家都係1 on 1，根本都冇人可以輸），而全班同學都知道，韻喬把口一直都唔係一盞省油的燈，因為俊軒同禮謙甚至其他男同學，都已經喺不同場合，包括辯論同口試，都領教過好多次。





所以大家都好想睇下，韻喬到底點樣為自己嘅出身同背景而戰。
 
「（喂程禮謙，唔知你有冇感覺，以小喬平時嘅嘅性格，一陣間佢應該會準備連環爆seed，去鬧今日新嚟嗰個咩嘉惠吖啦？）」俊軒喺自己個位度，先同呢幾日同自己大鬥法嘅禮謙好細聲咁講。
 
「（係黃嘉惠呀林大哥，不過唔係拍戲嗰個王家衛導演喎！）」禮謙聽到就試圖搞個gag，答返林俊軒，順便喺自己位附近緩和一下俊軒嘅情緒。

不過俊軒好唔領情咁講「（喂！你個gag一啲都唔好笑囉！睇你嘅戲啦！）」
 
「（不過我就覺得，呢個黃同學應該可能有堅料掛，居然有一個豹子膽，敢喺第一日轉校入嚟，就直接同全級考第一嘅人開拖，都唔知黃同學真係想越級挑戰吖，定還是有心喺度玩野啦！）」禮謙繼續同俊軒講。
 




正當兩個男仔繼續食花生，但係又好想出手護花嘅時候，被嘉惠無的放矢嘅韻喬，已經紅都面哂咁，繼續為自己同屋企嘅尊嚴而戰而開口講...

「唔好意思，要叫你啊黃小姐呀可？不過唔知你啱先咁樣同我講嘢法，算唔算係歧視同學呢？歧視同學本身就已經犯校規啦喎，而且，你啱先嘅說話，唔單止喺度歧視緊我，同埋我屋企嘅家人咁簡單，而你係歧視緊香港好多嘅平民百姓呀！？」
 
「而且邊個有話過，名牌甚至我地之類嘅貴族學校，就只可以畀咩達官貴人嘅子女先可以入讀咖？普通人如果成績夠好、有天分、有能力、有人賞識嘅話，唔通就唔可以接受呢啲名牌學校嘅教育咖啦咩？」

「依家出面新聞都成日講緊，年輕人要有向上流嘅方式，先可以出到去加強香港嘅競爭力呀嗎！如果以你呢種離地嘅諗法，恐怕都唔知係咩古老年代嘅思想嚟咖？你係唐代定係西漢穿越嚟呀？！有錢太子女！」
 
韻喬突然之間爆發呢番發人深省嘅說話，自然引來更多班上嘅同學注視，畢竟係一個有錢人新同學，以及普通百姓出身但又真係被邀請嘅明星級同學之間嘅大戰一觸即發，冇錯，佢地偏向都只係食花生。





當然，都有其他同學，因為韻喬後面所講嘅“唐代定西漢”論，而忍唔到笑伏喺自己張枱度不停咁震，呢種反差都令到班房裏面嘅氣氛，變得非常詭異。
 
「5A李天殷：謙謙王子，點算好呀？你覺得小喬同嘉惠咁樣講，會唔會誇張咗少少啊？        09:36」

直接坐喺核心内圍被逼觀戰嘅天殷，見到依家韻喬同嘉惠嘅勢色好唔對路，於是即刻喺櫃桶裏面，send Signal訊息向禮謙求救，然後天殷就擰轉身，做個口型叫禮謙睇電話“睇signal呀謙謙！“

遠處嘅禮謙喺收到天殷求救之後，就做咗個ok手勢回應天殷，然後一次過回咗好幾句畀天殷。當然，俊軒都有一齊睇過，到底要點樣化解今次嘅危機。
 
「5A程禮謙：殷殷，我見到呀，今次應該唔係得少少誇張咁簡單，直頭係上演緊一場大型保衛戰！        09:37」
「5A程禮謙：而且我同小軒聽完小喬嘅反駁之後，都即刻都咗嚇一嚇。       09:37」
「5A程禮謙：不過個黃嘉惠咁樣講嘢呀，小喬聽完會嬲到爆seed，都好正常啦！無啦啦仲要畀人話埋自己屋企人喎！       09:37」
「5A程禮謙：不過小弟我就覺得，你都係一陣要諗下辦法，睇下點樣氹返小喬先啦！             09:38」

正當天殷準備收禮謙Signal嘅時候...





（待續 ~）

IG link https://instagram.com/bear_big_big_writer