《愛在。貴族學園》: Ch 17 ~ 大小姐駕到 Part 9

Ch 17 ~ 大小姐駕到 Part 9（連載日期：2022/07/19）

「俊軒呀，唔知道你可唔可以呢，依家帶我去行下呢間學校唔同嘅地方，等我可以參觀一下之餘，順便都知道啲特別室呀、小食部之類嘅地方喺邊呢？」嘉惠稍為提高自己嘅聲線，目的就係要韻喬聽到，但韻喬依然不發一言，繼續做佢手上嘅嘢。

俊軒於是都頓一頓先再答「啊，唔好意思呀嘉惠同學，我諗你自己都有眼見到啦，我依家幫緊小喬手整理緊堆名單……」

「而且，你唔介意嘅話，其實你都可以搵5A嘅其他同學，或者等一陣放lunch嘅時候，先一次過去行都得……」俊軒其實都大概知道嘉惠嘅意思，但係又想繼續留喺度幫韻喬手，所以決定交個波畀其他同學。
 
至於韻喬，唔使講都知佢塊面已經黑過包青天。但因為嘉惠就坐喺天殷同自己嘅後面，所以嘉惠完全見唔到韻喬嘅表情。





不過，坐喺韻喬前面嘅同學，都因為好少見到韻喬黑面，而已經嚇到唔敢再講嘢。

嘉惠喺聽到俊軒因為韻喬呢個自己睇唔起嘅窮家女而拒絕自己嘅邀請之後，自然心生不滿，於是提高八度聲線勁唔服起咁講...

「又係小喬？點解……點解呢度無論係咩人，只要一見到張韻喬，就都係“小喬” “小喬“咁叫住佢咖！？」
 
嘉惠呢句爆seed嘅說話，再次引起5A其他同學嘅注意，視線一下子全部拉哂過去韻喬、俊軒同嘉惠嗰度，班房嘅氣氛突然陷入非常尷尬嘅局面，大家都等緊三個人裏面其中一個講野。
 
「嘉惠同學，你知唔……」俊軒試圖開口，但……





「你唔使幫我整啦小軒，呢啲都係啲好簡單嘅嘢嚟啫，我可以自己慢慢做，你得閒嘅話就同黃同學出去行下啦，畢竟Ms張都叫我地“關照”一下新同學咖嘛！你就聽下Ms張話啦！」韻喬突然之間插口道，不過居然唔係想同嘉惠嘈交。

因為韻喬覺得同呢種人嘈交冇意思，直接要對方喺自己面前消失，終止眼前嘅尷尬局面，都係最大體嘅做法。
 
「但係小喬，呢個唔係Ms張要我地幫佢做嘅嘢咩？如果我地做唔切嘅話，我怕一陣間會有麻煩喎！」俊軒完全唔能夠相信韻喬居然咁同自己講嘢，所以都即刻質疑韻喬嘅講法。
 
「得咖啦小軒，我話搞得掂就搞得掂咖啦，而且你地幾個呢幾日為咗我，咁辛苦照顧咗我咁耐，你就應該去休息一下啦，順便同黃同學去行下學校啦！如果唔係一陣要去特別室上elective，佢會蕩失路呀！你都唔想我地全班畀Ms張責怪咖嘛，係咪？」韻喬繼續好冰冷咁道出理由，好明顯就係想畀說話嘉惠聽。

嘉惠聽到韻喬咁講，好片面就覺得自己贏咗韻喬，於是就以一個勝利者姿態同俊軒講「係囉，俊軒，既然韻喬同學都話自己搞得掂嘅，你就去聽下韻喬同學話，同我一齊去行下學校啦！」





俊軒dead air咗好幾秒，同時注意到韻喬黑哂面嘅口型“你去啦，呢度我自己搞得掂，而且我好唔想見到佢喺度，你快啲同佢出去啦！”
 
喺明白到韻喬嘅意思之後，俊軒於是就話「咁好啦，既然小喬你都開到口啦，咁我就去休息順便同嘉惠四圍行下啦！辛苦你啦小喬！如果有咩搞唔掂嘅話，就叫我返嚟幫你搞啦！」

「好啦，頭先真係唔該哂你先！咁你同嘉惠Have Fun啦！」韻喬一邊講一邊繼續整嘢。

而嘉惠聽到韻喬”開綠燈“之後，就故意喺大家面前問「俊軒，既然韻喬同學都ok，咁你依家得閒陪我啦嗎？」

「得啦，咁我地行啦！小息唔係好長時間，唔好喺度同我哂時間！」俊軒說罷就同嘉惠出去，不過俊軒喺出去嘅時候，用一個好唔情願嘅表情回望韻喬。
 
而當俊軒同嘉惠出門口嘅時候，韻喬都繼續怒啤住嘉惠，然後自己再繼續搞名單。

但同時之間，韻喬突然發現自己嘅心，湧現出一種莫名嘅刺痛，感覺到有啲嘢好似喺自己身上俾人搶走咗咁，然後不自覺咁慢慢流下兩行眼淚。

或者點解會有人問，天殷點解頭先唔係度幫韻喬cover，係因為李小姐趁住小息時間，落咗去tuck shop買嘢食，順便買多盒古力奶畀韻喬。





（待續 ~）

IG link https://instagram.com/bear_big_big_writer