《愛在。貴族學園》: Ch 18 ~ 鬧翻 Part 6

Ch 18 ~ 鬧翻 Part 6（連載日期：2022/08/25）

「小喬，你覺得我套衫好唔好睇呀？我係認真問！」
 
韻喬於是就放低件蛋糕，再慢慢睇住着上黑色晚禮服嘅俊軒「嗯！好好睇呀，應該話，靚仔過喺平時學校太多，不過…不過就…..哈哈哈哈哈！」但係韻喬好快忍唔住，開始掩住半邊嘴喺度笑。
 
「不過咩呀？仲有你喺度笑咩呀？我個樣好奇怪咩？」俊軒頭已側咁追問笑緊嘅韻喬。

「林俊軒你個頭…今晚搞咩呀？你做咩gel到個頭成個北京鳥巢咁做咩呀哈哈哈哈！！」韻喬最後都係忍唔住，開始失控大笑。
 




「咩話！？北京鳥巢？！」俊軒即刻瞪大對眼，完全唔敢相信韻喬嘅說話，但好快林家女主人都出聲...

「小軒！你快啲自己去照下鏡啦！你gel到個頭咁樣….雖然屋企嘅客人係自己個女朋友，但係你點可以咁失禮咖？快啲去洗手間度整理一下！」林太帶少少緊張咁講。
 
「唔係嘛媽媽，咁誇張！？下我仲以為咁樣好睇添！」之後俊軒就即刻跑去塊鏡度照下「我頂！嘩真係好唔掂，我都係整整佢先！各位失陪先！」俊軒之後就好快上返自己睡房，再set過個頭。
 
「小軒呀，你其實用返平日喺學校個頭，再gel高少少就已經ok咖啦，唔好搞到太誇張啦，始終今晚我地唔係主角。」韻喬收起笑臉，好認真咁建議俊軒應該要點樣去set個頭。

俊軒聽到就就即刻去整個頭，然後好快就返返去韻喬身邊「小喬，依家咁樣我ok未呀？」





「咁樣就好過頭先好多啦，不如我地一齊影張相先？」韻喬少有咁主動同自己影相，俊軒當然都即刻應承，於是就叫譚管家揸機，幫自己同韻喬影幾張合照。
 
「又影得幾fit喎！多謝你呀譚管家！等我send返比你先啦，小喬！」「好呀小軒！多謝你呀譚管家！」

「唔使客氣，二少爺、張小姐！」

韻喬好快就收到俊軒傳嘅幾幅相，佢喺見到之後嫣然一笑，然後就陪俊軒食蛋糕，順便再等林氏伉儷裝身完畢。

就喺俊軒同韻喬兩個繼續傾計嘅時候，林生林太都已經裝完身，然後由樓上行落大廳「我地可以行啦，小軒、小喬！」「知道！」林生講完之後，佢地四個人就一齊坐車去會場。
 




而喺座駕上面，林氏三口心情好輕鬆。但韻唯獨喬心情都仲係比較緊張，畢竟自己本來就唔係屬於呢個社會階層，但就要去參加呢類party，喺陌生嘅場合，同陌生人打交道，自然都會覺得有啲不安。

「（你唔使咁緊張喎小喬，你今晚跟住我就可以咖啦！）」俊軒一眼就睇穿韻喬嘅不安感，然後就好大膽咁，主動拖起韻喬嘅手。
 
被拖嘅韻喬雖然感到放心同有安全感，但佢嘅情緒都冇辦法放鬆到，因為韻喬個心喺隻手被俊軒拖起之後跳得好快。

「小喬，你係咪唔舒服呀？做咩塊面突然間紅哂咁？」林太見到韻喬個表情突然變得奇怪，所以就即刻關心韻喬。
 
「喔…..唔係呀auntie，我諗可能都係因為我食咗藥，所以個人會有少少反應，多謝auntie關心先…」韻喬好細聲咁講。
 
林生聽到林太同韻喬嘅對話，就同韻喬講「唔緊要啦小喬，反正我地都係自己人呀嘛！如果你真係有唔舒服嘅話，同我地出聲就可以咖啦！」韻喬之後點點頭，向林氏伉儷道謝。

好快，林家嘅座駕就到達郭氏派對所在嘅會場，唔少城中嘅達官貴人都已經齊集，部分仲要係政府嘅司、局長，可謂大家都非常“俾面”郭氏。
 
去到會場正式嘅大門口，有幾名高大嘅保安人員把守，負責檢查參與者嘅邀請函，畢竟會場内唔係政要就係商界領袖，保安嘅措施自然令第一次參加嘅韻喬都感到非常誇張。同時，林生都將林家嘅邀請函，交比保安人員核對。




 
「可以入去啦，林生。唔該你地先，enjoy the night！」之後保安就將大門打開，韻喬於是就同林家一齊進入會場。

（待續 ~）

IG link https://instagram.com/bear_big_big_writer