Ch 18 ~ 鬧翻 Part 12(連載日期:2022/09/14)

正當大家準備跳嘅時候,有一個人不經意嘅出現,令到佢地四個人見到佢之後,都覺得非常頭痛,甚至比起頭先爭奪舞伴嘅情況更加頭痛同尷尬。

冇錯,呢位令人頭痛嘅人,正正就係今日第一日加入Form 5A嘅黃家大小姐,嘉惠。
 
「欸?!我冇眼花嘛?我居然喺度見到你地幾個!乜咁啱呀幾位新同學?!」嘉惠喺講完之後,就趁機會再打量一下自己眼中嘅”窮鬼“張韻喬。不過,大家都唔係太歡迎嘉惠加入佢地幾個之中。

而面對自己唔喜歡嘅人,嘉惠就當然唔會放過,可以公開奚落韻喬嘅機會,於是佢略帶挑釁語氣咁講「張韻喬同學,點解今日你都會嚟呢度嘅?而且……套衫都將你扮得唔錯喎!完全唔係日頭嘅你呢!」俊軒佢地幾個此時已經啤住嘉惠。
 


呢一刻嘅尷尬氣氛,比頭先一遇到嘉惠嘅時候,有過之而無不及,自然都比起邀請韻喬跳舞嘅時候就升高好幾倍嘅尷尬度,就係喺極度尷尬去到盡頭嘅氣氛,五個人都唔再講野。

再一次被嘉惠無理攻擊嘅韻喬,認為自己嘅尊嚴都比較重要,而且都唔可以任由嘉惠當衆奚落自己,所以決定自己親自應戰「黃嘉惠同學,我好多謝你嘅讚賞啦,而且你條裙都將你顯得唔差喎!」

「至於我點解都會出席今晚嘅party,咁係因為小軒,或者再準確少少,係林家嘅家長邀請我出席呢個party嘅!所以幸會幸會呀!黃嘉惠同學!」韻喬喺講嘅時候都要搬林家出嚟,目的都係想警告嘉惠,今晚喺度搞自己等同唔妥林氏伉儷。

嘉惠聽到係林家主動邀請韻喬之後,露出一個不可置信嘅表情,畢竟嘉惠自己根深蒂固嘅思維,覺得窮人係唔應該而且唔可以,喺呢個專屬上流社會嘅場合出現度出現,所以嘉惠再問「你話係……林家邀請你?!唔通,你地兩個係……?」
 
講到呢個關係,三歲細路都知道係講情侶啦。
 


但當時揪心嘅除咗嘉惠之外,仲有同死黨一直爭奪緊韻喬嘅禮謙。不過,禮謙都唔會咁容易認輸,而且佢自己一直都認為,只要一日韻喬未親口講出口同邊個拍拖,自己都仲有機會可以同韻喬成為情侶。

於是禮謙都出嚟話「唔係呀嘉惠同學,小喬同小軒佢地兩個,其實唔係你想像中嘅嗰種關係嘅。只不過,我地習慣咗好多野,都會四個人一齊做咋嘛,所以…嘉惠你就唔使太擔心太敏感嘅。」

嘉惠聽到之後就非常心安,然後見獵心喜,自然就想進攻韻喬。

不過,俊軒同天殷就非常不滿禮謙嘅講法,而且都怕禮謙咁講都會穿煲,所以都用非常凌厲嘅眼神望向呢位豬隊友。
 
至於嘉惠要進攻啲咩?當然就係同自己睇唔過眼嘅韻喬搶俊軒啦「咁樣呀,林俊軒同學,唔知你一陣可唔可以賞面,同我一齊出去跳舞呢?」而嘉惠講嘅時候,都故意啤咗韻喬一眼嚟抗議。
 


不過,空氣再一次瞬間凝結,首先大家都瞪大眼,望住不請自來呢個圈子嘅嘉惠。但好快,大家都轉而望向俊軒,因為大家都等住俊軒點樣回應。

而俊軒好快都落好決定,基本上係正常人都唔使點諗,都已經知道答案「嘉惠,今晚我真係好多謝你嘅好意。不過,都真係唔好意思,小喬既然係以我林家名義,請嚟呢個party嘅話,我自然要同返人地跳舞啦,呢個都係社交場合嘅基本禮貌,嘉惠,你喺呢個圈子咁耐,你都應該知道規矩咖啦?」
 
「所以,真係好對唔住,我唔可以應承你,而我今晚嘅舞伴就係小喬。」俊軒此時嘅眼神非常堅定,仲差少少就想拖起埋韻喬嘅手。

至於天殷同禮謙,都非常認同俊軒嘅決定,同時都企去俊軒同韻喬身邊,以示對佢地兩個嘅支持。

(待續 ~)

IG link https://instagram.com/bear_big_big_writer
已有 0 人追稿