Ch 20 ~ 心聲 Part 1(連載日期:2022/10/21)

就喺郭氏嘅Anniversary party結束之後,幾組唔同有出席到派對嘅參加者,喺返到各自嘅屋企之後,都有唔同嘅對話。而呢啲對話,全部都為之後發生嘅事,起到非常關鍵嘅作用。
 
首先就係一直幫緊俊軒同禮謙追韻喬嘅天殷,佢喺返到屋企除低套晚禮服之後,就即刻打電話同俊軒、禮謙,商量一下呢兩日發生喺韻喬身上嘅事。
 
「喂天殷?做咩咁夜都仲唔訓之餘,仲要喺呢個時候走去開三人會議呀?」接電話嘅係送完韻喬返北角嘅禮謙。而當時俊軒都已經喺電話裏面「做咩呀?你好攰想訓啦程禮謙?」

天殷聽到禮謙接咗電話之後,就略帶抱歉道「唉呀,真係唔好意思呀兩位男士,其實我自己都唔想咁夜,阻住大家休息咖,而且經過呢兩日發生嘅事,其實我都覺得好攰…」
 


「但係我其實咁夜打電話畀你地,都係想同你地講一件事,而且我覺得有啲急添,所以頭先我喺車上面諗過咖啦,如果我地星期一翻到學校先傾嘅話,我怕到時候都已經太遲,而且都已經有新一單嘅事情發生都唔出奇…」天殷繼續講落去,但係最後嘅兩句,自然都引起到兩位男仔嘅注意力。

「件事有啲急?!咁到底係咩咁急嘅事,一定要喺今晚傾先?呀等我一陣,我去鎖一鎖門先……..ok天殷你可以繼續啦…」禮謙道。

「係囉殷殷!或者,聽日先講都得咖啫!」俊軒都表示同意禮謙嘅睇法。

「咁我聽日全日都唔得閒,我要陪我爸爸媽媽出去吖嘛!」天殷然之後深呼吸咗一下,然後就開始間俊軒同禮謙「既然大家都覺得夜啦,咁我都長話短說啦。今晚我想講嘅,就係喬喬嘅感情事,所以我先會話唔方便喺學校講啫。」
 
「其實,喺經過我觀察最近一輪,你地兩個各自同喬喬之間嘅互動之後,我就已經睇得出個結論。喬喬所鍾意嘅人,其實就係你……林俊軒!」天殷最後講呢句嘅時候,語氣異常嘅平靜。



俊軒即刻就已經畀人嚇到冇聲出「軒少呀,我一早都話咗小喬同學係鍾意你咖啦!頭先喺會場出面,人地都已經kiss咗你啦,你仲死都唔認小喬鍾意你!你仲話咩小喬一日唔親自講鍾意邊個都唔會firm,你睇下,依家連天殷都咁講啦!」禮謙帶點小激動咁同俊軒講。

「咁事實真係佢一日都唔講出口嘅話,我都唔可以咁武斷就話小喬鍾意咗我咖嘛!Econ都唔係有教咖咩?」俊軒試圖用學術去反駁禮謙。

「不過,有個問題嚟啦,到底小喬自己知唔知道自己鍾意咗人先?如果小喬唔知嘅話,我地幾個喺度講乜都冇用咖喎!」

天殷聽到俊軒嘅推斷,就斬釘截鐵咁講「咪就係唔知囉!如果小喬自己知道嘅話,就唔會搞到依家咁情況啦!」
 
「而且你地都唔好唔記得,尋日嘉惠同學嘅加入,佢嘅目標已經非常明確,就係想用身份去奚落小喬,然後就去搶小軒你!呢個人嘅所作所為,都好影響到你同小喬將來嘅幸福咖!」
 


天殷喺講完呢句之後,忽然之間大家都喺電話度靜咗落嚟,兩個男仔一時之間都唔知點答「咁呢個,其實我地都知嘅…」

但係好快,禮謙就突然之間開口話「嗱軒仔,其實我地經歷過咁多嘢之後,我自己都諗得好清楚咖啦。我諗,我都係退出呢場爭戰啦!可能係我之前喺醫院嘅表白,先會令到小喬依家心猿意馬,唔知道自己鍾意邊個掛!」
 
「而且軒仔,正如我頭先喺會場出面嘅時候,都已經同你講過,呢個世界仲有你去愛小喬,所以,我希望我割愛之後,林俊軒你可以好好幫我去愛小喬,好嗎?」

(待續 ~)

IG link https://instagram.com/bear_big_big_writer
已有 0 人追稿